Ish-futbollisti i Vllaznisë, Fatmir Lugji ka bërë një deklaratë ‘bombastike’. Në një intervistë të dhënë për Studio Sport, Lugji ka lëshuar akuza të rënda në drejtim të klubit kuqeblu.
Sipas tij institucionet përkatëse duhet të bëjnë punën e tyre duke parë këtë situatë të çuditshme dhe vazhdimësinë që i mungon Vllaznisë.
Lugji shprehet se në Shkodër po luhet në fushën e futbollit, por edhe në tastiera.
Kjo nënkupton që ish-futbollisti i klubit shkodran ka dyshime që ndeshjet mund të jenë trukuar.
“Duke parë situatën e Vllaznisë, duke parë edhe ndeshjen e fundit me Erzenin, unë akoma nuk e kam marrë veten kur kam parë stadiumin “Loro Boriçi” në atë gjendje, është e pafalshme që në Shkodër, stadiumi të jetë bosh. Dhe këtë zbrazëti të stadiumit, kush e ka sjellë? E kanë sjellë lojtarët, e kanë sjellë trajnerët, e kanë sjellë presidenti dhe të gjithë ato që merren me Vllazninë, dhe prandaj ka ardhur një moment që tashmë duhet thënë, stop këtyre problemeve. Duhet shikuar mirë, për të bërë një analizë dhe gjithësecili ta mbajë përgjegjësinë, sepse në qoftë se do të vazhdojë kështu, do të kemi një tragjizëm me Vllazninë dhe përsëri do të kalojë në Kategorinë e Parë.
Kush janë problemet kryesore? Unë për mendimin tim, sot e kam menduar dhe kam arritur në përfundim: Me Vllazninë luhet në dy fronte, në fushën e futbollit dhe në tastierë. Këtë duhet ta shikojnë drejtuesit, këtë duhet ta shikojnë institucionet që merren me këtë punë, pse jo edhe institucionet penale që merren me këtë punë, sepse po luhet me ndjenjat e tifozërisë shkodrane.”
