Gjykata e Posaçme e Apelit ka lënë në fuqi masën e sigurisë “arrest me burg” për ish-shefin e komisariartit të Kurbinit, Dritan Metaj, i arrestuar në kuadër të operacionit “Flakë në det”. Metaj kishte kërkuar në apelin e GJKKO një masë më të butë sigurie.
Për shkak të njohjeve të vjetra, Dritan Metaj dyshohet se lëvizte me makinën e tij, Gëzim Çelën nga Fushë Kuqja, i njohur ndryshe si “Baroni i drogës” për t’iu shmangur arrestimit nga Policia. Ata njiheshin bashkë që në kohën kur ishin kolegë, kur Gëzim Çela ishte efektiv policie.
Metaj ka pranuar fajësinë në seancën e kaluar ku ka deklaruar: “Kam bërë gabim, por e kam bërë pasi e njihja më herët dhe nuk e shmangia dot”.
SPAK ka shpallur në kërkim shtetasit Gëzim Çela i njohur si “Baroni i Drogës”, Arben Dalipaj banues Vlorë, Roland Guzo banues në Durrës. Këta tre persona dyshohet se ndodhen jashtë vendit.
Në muajin gusht, në operacionin “Flakë në Det”, policia godit një tentativë e trafikimit të drogës me varkë velierë nga lugina e Patokut në drejtim të Italisë, më konkretisht dyshohet se do shkëmbehej në mes të detit kanabis me kokainë. Në atë kohë u arrestua kushëriri i Gëzim Çelës, Nerim Çela, si dhe ish-punonjësin e Policisë së Shtetit, Arlind Ismailukaj, Armando Mema, Besnik Brokeri nga Vlora dhe dy korrierët me shtetësi ukrainase Kyrylo Ponomarenko dhe Kostiantyn Biellon.
Njoftimi:
“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Florjan Kalaja, sot më 30.10.2023, shpalli vendimin mbi çështjen penale nr. 52 akti, datë 26.10.2023 regjistrimi, regjistruar mbi ankimin e paraqitur nga i hetuari/ankuesi D.M., ndaj vendimit nr. 111, datë 10.10.2023 (në lëndë të masave të sigurimit) të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi:
– Miratimin e vendimit nr. 111 akti datë 10.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar”-thuhet në njoftim.
