Prej orës 10:00 të ditës së sotme, në Kryesinë e Kuvendit po zhvillohet mbledhja e grupit parlamentar të Partisë Socialiste. I pranishëm në këtë mbledhje është edhe kryeministri Edi Rama.
Bëhet me dije se në fokus të diskutimit është buxheti dhe koordinimi i punës në Komisione, ku mazhoranca ka refuzuar të gjithë komisionet hetimore (koncensionet në shëndetësi, sistemi TIMS dhe ndryshimi për anëtarët e reformës zgjedhore) të kërkuara nga opozita.
Kuvendi prej disa ditësh është kthyer në një arenë përplasjesh ku deputetët e opozitës kanë nisur një aksion pa kthim dhe nuk lejojnë zhvillimin normal të seancave plenare deri sa në vendin tonë të rikthehet normaliteti.
Gjithashtu media pranë qeverisë, konfirmojnë me burime se Kongresi i Partisë Socialiste, i parashikuar për t’u zhvilluar në 4 nëntor, do të spostohet në javën e parë të dhjetorit. Lajmin e ka bërë të ditur vetë kryeministri Edi Rama gjatë fjalës së tij në mbledhjen e grupit të PS-së por pa dhënë arsye për shtyrjen e Kongresit të Jashtëzakonshëm.
