Shqipëria dhe Franca kanë nënshkruar këtë të martë 4 marrëveshje bashkëpunimi në fusha të ndryshme në kuadër të vizitës zyrtare të presidentit francez Emmanuel Macron në Tiranë.
Marrëveshjet u nënshkruan në praninë e Macron dhe kryeministrit Edi Rama dhe shkojnë në drejtim të forcimit të marrëdhënieve, pesë vjet pas nënshkrimit të Deklaratës së Partneritetit Strategjik midis dy vendeve.
Marrëveshja e parë është udhërrëfyes për bashkëpunimin ekonomik midis Republikës së Shqipërisë dhe Republikës së Francës.
Marrëveshja e dytë është memorandum i mirëkuptimit për bashkëpunimin e ndërsjellë midis Këshillit të Ministrave të Republikës së Shqipërisë, të përfaqësuar nga Agjencia Shtetërore e Programimit Strategjik dhe Koordinimit të Ndihmës dhe Agjencisë Franceze të Zhvillimit (AFD).
Marrëveshja e tretë është ajo e bashkëpunimit ndërmjet Ministrisë së Kulturës së Republikës së Shqipërisë dhe Qendrës Kombëtare për Kinemanë dhe Imazhet e Animuara të Republikës Franceze.
Marrëveshja e katërt është deklarata e qëllimit ndërmjet Ministrisë së Brendshme të Republikës së Shqipërisë dhe të Ministrisë së Brendshme dhe të përtej Detit të Republikës Franceze, në lidhje me forcimin e bashkëpunimit policor në fushën balistike.
Vlen të theksohet fakti se presidenti francez premtoi 600 milionë euro mbështetje për Shqipërinë për projekte të ndryshme, deri në vitin 2027.
Premtimi i Macron: 600 milion euro mbështetje për Shqipërinë, deri në vitin 2027
