Anëtarja e këshillit bashkiak të Partisë së Lirisë në Bashkinë e Tiranës, Erion Bixha deklaroi sot se, “hapësira e parkimit në Tiranë është një nga problemet kryesore për qytetarët”.
“Territori i Bashkisë Tiranë është duke u zhvilluar çdo ditë, ku me qindra metra katror ndërtohet në kryeqytet duke e kthyer trafikun dhe parkimin në një mankth për qytetarët. Sipas statistikave vetëm 1% e makinave në Tiranë mund të gjejnë vend parkingu publik falas”, tha ajo.
“Që prej vitit të parë kur u themelua instuticioni “Tirana Parking”, numri i vendeve të parkingut të lirë publik filloi në rënie çdo vit. Karta e Rezidentit nuk i permbush nevojat e qytetarëve për të parkuar aty ku ata banojnë apo janë rezident”, u shpreh Bixha.
“Problemi me parkimin filloi me “zaptimin” e qytetit nga kullat e shumta dhe të larta. Me evuoluimin e qytetit, ndërtimet pa kriter dhe zënia e hapsirave publike përshkallzojnë problemin çdo ditë e më shumë duke ngushtuar hapësirat publike”, theksoi Bixha.
Sipas saj, “pikerisht, kjo situatë bën që qytetarët çdo ditë e më shumë të përballen me gjobat e shumta të vendosura nga Policia Bashkiake. Banorët e kryeqytetit për shkak të mungesës së hapësirës për parkimin falas për rezidentët, detyrohen të parkojnë në rrugët që i nënshtrohen sistemit të tarifimit të cilët duke mos kryer pagesën në kohën e duhur dhe sipas mënyrës së duhur, gjobiten nga Policia Bashkiake”.
“Një tjetër problematikë e hasur është edhe mungesa e sinjalistikës apo dobësimi i sinjalistikës me kalimin e kohës duke mos e bërë të qartë për qytetarët nëse një hapësirë boshe është apo jo hapësirë parkimi për rezidentët. Në pjesën më të madhe të rrugëve, vijat e bardha që tregojnë hapësirën e parkimit për rezidentët janë fshirë totalisht”, tha ndër të tjera Bixha.
