Nga Boldnews.al
Ministrja e Infrastrukturës dhe Energjisë, Belinda Balluku, ka hapur një tjetër procedurë, në tentativë për të ndihmuar koncesionarët e Portit të Ri në Vlorë. Në fakt, ky tender vjen në një mori vendimesh të pinjolles së familjes Balluku, i cili fillon me procedurën e zhvendosjes së portit aktual në qendër të Vlorë për ta degdisur në portin e peshkimit. Ky vendim i hapi rrugë ndërtimit të Marinës së Vlorës, ku po ndërtohen pallate dhe hotele shumë katëshe në territorin e këtij porti. Madje, ekskavatorë kanë filluar punën në atë pronë, dikur shtetërore për të ndërtuar ato kulla. Ndërkohë, nga ana tjetër, një mori vendimesh kanë sjellë që porti aktual të zhvendoset në zonën e Triportit, teksa ndërtimi i atij porti është dhënë me koncesion nga Ministria e Infrastrukturës. Vendimmarrje që kanë shtuar kostot në buxhetin e shtetit. Madje, edhe procedura e fundit.
Dokumenti i mësipërm është tenderi i ri i shpallur nga Ministria e Infrastruturës dhe Energjisë, institucion i drejtuar nga Belinda Balluku, njëherësh edhe z.kryeministre. Dokumenti është hapja e procedurës “shërbime inxhinierike të pavarura për zbatimin e kontratës koncesionare për projektimin, ndërtimin dhe mirëmbajtjen e ‘Portit të Integruar’ në Triport Vlorë”. Pra bën fjalë për një procedurë të dhënë me koncesion kohë më parë! Para të hedhura në një punë që i është dhënë privatit, madje procedurë prej dhjetëra miliona eurosh. Fondi limit i kësaj procedure është 70.554.393 lekë, ose rreth 700 mijë euro që i bashkëngjitën fondeve të akorduara që do t’i jepen provatit përgjatë gjithë koncesionit.
Koncesioni i Triportit është dhënë në vitin 2021. BoldNews.al ka raportuar edhe më herët për këtë procedurë, e cila ka pasur hije të mëdha dyshimi, pasi firmat fituese ofruan 1.4 milionë euro më shumë sesa oferta më e ulët. “Procedura ka qenë ‘dhënia me koncesion/partneritet publik privat për projektimin, ndërtimin dhe mirëmbajtjen e ‘Portit të Integruar’ në Triport Vlorë. Vendndodhja është në pjesën qendrore-jugore të bregdetit shqiptar, rreth 2 km në veriperëndim të Vlorës dhe jo shumë larg rreth 1,5 km në juglindje Nartës dhe Lagunës Homogjene të Nartës” shkruante BoldNews.al.
Në dokumente thuhet se kohëzgjatja e kontratës së koncesionit/PPP është 10 vjet. Njoftojmë se, kanë qenë pjesëmarrës në procedurë ofertuesit me vlerat përkatëse të ofruara BOE ‘AGBES CONSTRUKSION’, ‘BESTA’, ‘Premium Construction & Maintenance’, ‘ITE. GRUP’ dhe ‘ARKONSTUDIO’. Këto firma kanë pasur një ofertë me vlerë totale të ndërtimit dhe të mirëmbajtjes prej 40.000.000 euro. Ndërkohë, shoqëria ‘ALBAVIA’ nuk ka paraqitur ofertë. Ofertë ka paraqitur shoqëria ‘ED KONSTRUKSION’, me vlerë totale të ndërtimit dhe të mirëmbajtjes prej 38.650.000 euro. Por, kjo shoqëri është s’kualifikuar dhe fitues është shpallur oferta me rreth 1.4 milionë euro më shumë. Si në të gjitha këto koncesione apo tenderë të mëdhenj, fituesit shpallen ata që ofrojnë më shumë!”
