Biznesmeni i ndërtimit Lul Morina është paraqitur në Prokurorinë e Posaçme këtë të Hënë. Burime pranë akuzës thanë se Morina është thirrur nga SPAK për të dëshmuar në lidhje me një çështje nën hetim, pa specifikuar çështjen në fjalë apo rolin e tij.
Biznesmeni Morina është pronari i godinës 9-katëshe për të cilën qeveria njoftoi me bujë konfiskimin në kuadër të aksionit flluskë kundër ndërtimeve pa leje.
Në fillim të Shtator të një viti më parë, ishte zëvendësministrja Belinda Balluku e cila krah shefes së atëhershme të IKMT-së Dallëndyshe Bici njoftuan zbulimin e godinës 9 kate pa leje. Madje, Balluku shprehu habi sesi ishte e mundur që të ndërtohej pa leje një strukturë e tillë.
“Janë 7 kate mbi tokë dhe 2 kate nën tokë. Sesi kjo ka ndodhur për të thënë të drejtën është një mister për ne”, do të shprehej asokohe Balluku.
Më pas, siç raportoi Boldnews, u arrit një marrëveshje mes biznesmenit Morinës dhe qeverisë për të riblerë ndërtimin pa leje siç parashikonte nisma e qeverisë.
Ndaj tij ka nisur nga prokuroria e Tiranës lidhur me pallatin në fjalë, por deri më tani organi i akuzës nuk ka kërkuar asnjë masë shtrënguese ndaj Morinës.
Ky i fundit rezulton problematik përsa i përket historikut të ndërtimit pa leje, ndërsa më herët ka pasur procedime të tjera ndaj tij për këtë vepër penale.
“Boldnews” ka raportuar se Morina ai kishte ndërtuar një godinë pa leje në Dhërmi. Ndërkohë, një raportim mediatik gati dy vite më parë nga “occrp.org”, Lul Morina përshkruhet si biznesmen me lidhje me familjarët e kryeministrit Edi Rama dhe partner biznesi i familjes indiane Sandesara, në kërkim nga shteti i tyre për mashtrim me vlerë 700 mln USD dhe pastrim parash.
