Kreu i PD-së së vulës, Lulzim Basha ka reaguar sërish ndaj akuzave të Gazment Bardhi, sipas të cilit familjarët e tij janë pronar të dy kateve në kullën “Lion Residence” në hyrje të parkut tek Liqeni Artificial, të cilën sipas tij e ka marrë me porosi një muaj pas humbjes së zgjedhjeve në vitin 2021.
Në një postim në rrjetet sociale, Basha i konsideron akuzat e Bardhit si shpifje dhe mashtrime të dëshpëruara, pjesë e lojës së pisët dhe të vjetër të baltosjes. Ai shton më tej se aleanca e kullave dhe e non gratave nuk do ta bëjë pis e as do ta mbajë peng Partinë Demokratike.
Basha shprehet se nuk ka porositur kulla dhe as nuk ka marrë kate në asnjë kullë dhe sipas tij, duan që ta shfokusojnë nga problemet e shqiptarëve. Gjithsesi, Basha nuk bën me dije nëse do e padfitë për shpifje Bardhin apo jo.
Reagimi i Bashës:
Aleanca e kullave dhe e non gratave nuk do ta bëjë pis e as do ta mbajë peng Partinë Demokratike. Njerëzit e dinë mirë çfarë përfaqësojnë këta individë dhe interesave të kujt i shërbejnë. Janë të njëjtët që sot flirtojnë me atë të cilit dje i thoshin vrasës.
Sa për gënjeshtrat e fundit: Unë as nuk kam porositur kulla dhe as nuk kam marrë kate në asnjë kullë. Këto janë mashtrime të dëshpëruara, pjesë e lojës së pisët dhe të vjetër të baltosjes.
Ndërsa çështja McGonigal është kthyer në aktakuzën më të rëndë ndaj sulmeve të ulëta kundër meje prej Edi Ramës e Sali Berishë, si edhe prej kujtdo tjetër që po përdoret prej tyre. Se kush e shpëtoi Edi Ramën nga llogaridhënia për Kosovën, e pamë mirë në konferencën e djeshme të kryetarëve dhe në konsensusin për të ruajtur imazhin e Ramës.
Kaq në respekt të qytetarëve, sepse asgjë nuk pres nga ata që për hallet dhe karriket e tyre, duan të na shfokusojnë nga problemet e Shqipërisë dhe të shqiptarëve.
Ashtu si padrinoja non grata e humbi luftën e shpifjeve disa vjeçare, pasi koha e nxorri të vërtetën në dritë, edhe zëdhënësin e tij të radhës e pret i njëjti fat.
Bardhi: Basha pronar i dy kateve tek “Lion Residence”, takon pronarët në garazhde
