Një individ ka përjetuar brenda një kohe të shkurtër një metamorfozë të çuditshme; në muajin dhjetor të vitit 2025 e shikonte veten pas hekurave të burgut, i akuzuar për vdekjen e një punëtori, ndërkohë në muajin prill të këtij viti, fati i ka buzëqeshur me një super leje.
Bëhet fjalë për Avni Mekshin, pronar i disa kompanive të ndërtimit, i cili nga qelia e burgut arriti të marrë një leje me firmën e kryeministrit Edi Rama për të ndërtuar një kullë 16 kate, 14 mbitokë dhe 2 nëntokë.
Normalisht, gjatë kohës së firmosjes së lejes, Mekshi duhet të ketë qenë nën hetim apo gjykim për veprën penale, por kjo s’e ka penguar që të plotësonte me shpejtësi letrat për kullën në territorin e Njësisë Numër 7 në Tiranë. Duket se, nga kantieri në Paskuqan, Mekshi erdhi në Tiranë, ndërsa në radhët e ndërtuesve njihej si “miku” i Çim Beshirit.
Në dhjetor të vitit 2025, sipas denoncimeve të njëpasnjëshme të redaksisë së Vox News, Mekshi u arrestua me disa vepra penale, teksa ai punonte pikërisht në kantierin e firmës së Shkëlqim Beshirit. Në atë kohë, policia dhe organet e tjera ligjzbatuese mbrojtën djalin e Beshirit, duke ngritur akuzë vetëm ndaj Mekshit, teksa koha kaloi dhe emri i të ndaluarit del te leja e radhës.
Sipas dokumenteve që disponon Vox News, Këshilli Kombëtar i Territorit dhe Ujit ka zbardhur lejen me objekt “godinë banimi dhe shërbimesh 14 kate mbi tokë, me 2 kate nëntokë” me vendndodhje në rrugën “Javer Malo”, Bashkia Tiranë, me subjekt zhvillues shoqërinë “No – Ma Construction” sh.p.k. Mësohet se pronar me 100 % të aksioneve të kësaj firme është pikërisht z. Avni Mekshi.
Në dokumente përcaktohet se leja është zbardhur në datën 7 prill 2026, nga KKTU-ja, teksa mban firmën edhe të ministrit të Infrastrukturës dhe Energjisë, Enea Karakaçi. Nuk dihet nëse këta shtetarë kanë verifikuar të kaluarën e pronarit të firmës, por fakti që ia firmosin me “symbyllur” do të thotë se jo.
Tashmë presim që Mekshi apo drejtuesit e tjerë të firmës të mos bëjnë të njëjtin gabim, me pasoja fatale herën e kaluar. Nëse ai ka qenë një prestanome apo koperturë e personave të tjerë, kjo mbetet për t’u verifikuar nga institucionet ligjzbatuese, por fakti se ai ka kaluar nga burgu te leja do të thotë se pas tij qëndrojnë persona me influencë, qoftë në biznes apo edhe në administratën shtetërore.
Vox News ka ndjekur në vijimësi rastin e humbjes së jetës të elektricistit Hail Picari, në muajin dhjetor të vitit 2025, teksa dyshohej se punëtori ka rënë nga kati i tetë i pallatit dhe ka ndërruar jetë në vend.
“Ngjarja u tentua fillimisht të mbahej jashtë vëmendjes publike, por pas raportimit të VoxNews, Policia e Shtetit reagoi duke njoftuar arrestimin e administratorit të firmës nënkontraktore ‘Al Great’ sh.p.k., Avni Mekshi, për shkelje të rregullave të sigurisë dhe mbrojtjes në punë”, do të denonconte redaksia jonë.
Mësohet se policia ruajti në atë kohën emrin e kompanisë ndërtuese, e cila ishte “Fare Bau Albania”, me administrator Fabio Beshirin, djali i Shkëlqim (Çim) Beshirit. Çështja duket se është mbyllur nga institucionet ligjzbatuese, teksa tashmë emrin e Mekshit e lexojmë në lejen e ndërtimit.
Në dokumentet e kësaj leje të re, rezulton se sheshi i ndërtimit ndodhet në rrugën “Javer Malo”, me distancë prej 2,3 km nga qendra e qytetit. ‘Zona përreth sheshit karakterizohet nga banesa individuale pas viteve ’90 dhe objekte të reja shumëkatëshe në ndërtim”, thuhet në dokumente. Objekti që do të ngrihet është plot 16 kate./ Voxnews
