Pas sulmit të së dielës në Banjskë të Zveçanit, kryeministri Edi Rama ka kërkuar që KFOR-i të marrë nën kontroll veriun e Kosovës. Në një konferencë për shtyp këtë të enjte, kreu i qeverisë tha se është në njëjtën linjë edhe me Kosovën në këtë kërkesë, ndërsa vlerëson presidenten Osmani që i ka kërkuar ndihmë SHBA-së për draftin e asociacionit.
“KFOR-i duhet të marrë në kontroll veriun. Çdo hezitim dhe vonesë dhe me argumentin e orëve të fundit se kemi apo jo trupa mund ta bëjë ndërhyrjen e nesërme të KFOR-it shumë më të madhe në trupa dhe vështirësi. Prandaj jam këtu sot dhe më vjen mirë që këtë e kërkon edhe Kosova KFOR-in në veri. Më vjen mirë që dje presidentja Osmani ka kërkuar ndihmën e SHBA-së për draftin e asociacionit. Nuk di cili është mendimi i aleatëve strategjikë për këtë kërkesë, por në thelb kërkesa është pozitive dhe është një hap në drejtimin e duhur nga ana e Kosovës”, tha Rama.
Sipas tij, një draft duhet të vihet në tryezë një orë e më parë, teksa sjell në vëmendje planin franko-gjerman.
“Një draft duhet të vihet në tryezë një orë e më parë dhe të përmbushë kërkesën legjitime që ka procesi i dialogut bazuar mbi marrëveshjet mes qeverisë së Kosovës dhe Serbisë. Kosova sot më shumë se para se të ndodhte tragjedia duhet ta kërkojë me këmbëngulje dialogun, ta besojë dhe ta synojë me të gjithë energjitë përfundimin me sukses të dialogut. Plani franko-gjerman është akoma në tryezë”, deklaroi.
Ndryshimi i qëndrimit
Gjatë konferencës, Ramës iu kujtua nga gazetarët një postim në Twitter më 19 qershor të këtij viti, kur shprehej kundër asaj çka kërkoi sot, duke thënë ironizuar atë që ai e quante “Republika e KFOR-it” në Veri.
“Nëse situata agravohet duke rikthyer KFOR-in në krye të punës, atëherë lamtumirë për kush di sa kohë dhe kontrollit formal të shtetit mbi krejt territorin dhe ta gëzojmë një Republikë të KFOR-it në Veri të Kosovës”, shkruante Rama në platformën online.
Konstatimit për këtë ndryshim në qëndrim mbi situatën në Kosovë, Rama iu përgjigj duke thënë se nuk përjashtohet mundësia që të arrijmë te “Republika e KFOR-it” që ai ka përmendur më parë.
“Nuk jemi akoma aty por mund të shkojmë dhe aty, patjetër. E shikoni ju se çfarë ndodh. Kjo është diçka që nuk duhet ndonjë mençuri e veçantë as dhunti për të parë të ardhmen. Duhet vetëm përqendrim tek vija historike dhe vija e sjelljes së aktorëve në fushë për të kuptuar si mund të shkojnë gjërat. Kështu që akoma nuk jemi aty, por nëse sot nuk ka reagim do shkojmë aty. Me Facebook dhe me kolltuk në klubet e natës mediatike, mund të nisësh avionët, helikopterët, raketat dhe të shkosh ta shkatërrosh njëherë e mirë armikun. Në realitetin e gjeopolitikës dhe ballafaqimit të sotëm punon me strategji dhe punohet me mençuri dhe diplomaci. Kardshillëku është shprehje e përgjegjësisë, kështu që mos ma bëni si ata që thonë pes i thu kriminel pse s’i thua terrorist, se ti je vëllai i Vuçiçit.”
