Në mbledhjen e Kryesisë së Partisë Demokratike është njoftuar vendimi për përjashtimin e 11 deputetëve të kësaj force politike. Lulzim Basha ka çuar shkresë në Kuvend për përjashtimin e këtyre deputetëve.
Avokati Marash Logu, në një intervistë për FaxNews duke u bazuar sipas tij në nenin 16 të rregullores së Kuvendit, është shprehur se ky vendim është pa baza ligjore.
Logu thotë për gazetaren Rovena Neziri se regullorja përcakton që për çdo anëtar të ri në ndonjë grup parlamentar, apo për çdo përjashtim, duhet që vetë anëtarët e Grupit Parlamentar të mblidhen dhe të vendosin diçka të tillë. Në këtë rast, thotë Logu, kjo procedurë nuk është kryer dhe nuk mund të kryhet nga asnjë strukturë tjetër, qoftë partiake apo institucionale, sepse është një e drejtë e plotë e vetë Grupit.
Avokati tregon se duhet që të paktën, mbledhja e anëtarëve të ketë kuorumin e nevojshëm dhe shumica e anëtareve të bien dakord në vendimmarrje të tilla.
Marash Logu: Pa dashur të futem në atë që njihet si konflikti brenda PD-së, që nuk i ka shërbyer as opozitës as PD-së, përkundrazi ka ndikuar në dobësimin e saj dhe në forcimin e pushtetit të Edi Ramës. Mendoj që po t’i referohemi rregullores së Kuvendit, çdo vendim për përjashtim apo pranim të një anëtari të ri të Grupit Parlamentar bëhet nga vetë Grupi Parlamentar.
Anëtarët mblidhen dhe vendosin. Nuk ka pasur një mbledhje të tillë për të përjashtuar apo për të pranuar anëtarë të rinj. Të njëjtën gjë që grupi bën dhe për emërimin e një kryetari grupi, ashtu ndodh dhe për anëtarët e rinj. Asnjë strukturë tjetër, partiake, institucionale, nuk mund ta diktojë këtë.
Çdo vendimmarrje e bërë jashtë këtij formati, nuk është në përputhje me rregulloren e Kuvendit, kështu që nuk ka asnjë lloj vlere. As kryetari i partisë. Sipas rregullores së Kuvendit, në nenin 16 të saj e ka përcaktuar që janë grupet parlamentare që zgjedhin se kush janë drejtuesit ashtu siç vendosin për përjashtimin e anëtarëve që mund të kenë thyer rregulloren.
Duhet që të paktën mbledhja të ketë kuorumin e nevojshëm dhe shumica e anëtarëve të marrin këtë vendimmarrje. Për sa kohë nuk ndiqet kjo rrugë, çdo lloj vendimi nuk prodhon vlerë ligjore.
