Një ngjarje e rëndë kriminale është regjistruar në Dubai, ku një asistente fluturimi 25-vjeçare u gjet e pajetë në një dhomë hoteli luksoz, pasi dyshohet se është goditur të paktën 15 herë me gërshërë.
Si autor i dyshuar është arrestuar ish-bashkëshorti i saj, Albert Morgan, 41 vjeç, avokat nga Rusia. Sipas raportimeve të Daily Mail, Morgan u ndalua nga autoritetet ruse sapo mbërriti në aeroportin e Shën Petersburgut, pas kthimit nga Emiratet e Bashkuara Arabe.
Hetuesit dyshojnë se 41-vjeçari e kishte përndjekur ish-partneren në Emiratet e Bashkuara Arabe, i shtyrë nga xhelozia ekstreme. Sipas burimeve hetimore, Morgan besonte se viktima po e mashtronte dhe dyshonte se ajo punonte si eskortë luksoze për klientë VIP, pretendime që nuk janë konfirmuar nga autoritetet.
Raportohet se ai kishte rezervuar një dhomë në të njëjtin hotel me ish-bashkëshorten për të pasur akses pranë saj. Sipas hetimeve paraprake, qëllimi fillestar i tij dyshohet se ishte ta poshtëronte publikisht, duke e lyer me bojë jeshile dhe duke i prerë flokët me gërshërë, por situata ka përfunduar në mënyrë tragjike.
Autoritetet po vijojnë hetimet për zbardhjen e plotë të rrethanave të krimit, ndërsa 41-vjeçari pritet të përballet me akuza të rënda penale.
