Policia ka arrestuar ish-drejtorin e burgut “Kosova” në Lushnjë, Judmir Shurdhi, 43 vjeç, banues në Lushnjë, i cili ishte shpallur në kërkim pasi Gjykata e Posaçme kundër Korrupsionit dhe Krimit të Organizuar e ka dënuar me 1 vit e 4 muaj burgim, për veprën penale “Shkelja e barazisë së pjesëmarrjes në tendera apo ankande publike”, kryer në bashkëpunim.
Judmir Shurdhi është vënë në pranga në kuadër të operacionit policor të koduar “Takimi i fundit”, ku arrati për të ka marrë fund pas 10 muajsh.
43-vjeçari, i cili në periudhën 2020-2021 ka qenë drejtor në burgun e Kosovës, Lushnjë, në bashkëpunim me persona të tjerë, ka kryer veprime që përbëjnë shkelje të barazisë së pjesëmarrjes në tendera apo andande publike.
GJKKO e dënoi me 2 vite burg, por me gjykim të shkurtuar ai do të kryejë 1 vit e 4 muaj burg, ndërsa do t’i hiqet e drejta për të ushtruar funksione publike për 5 vite.
Nga hetimet e SPAK ka rezultuar se në procedurat e prokurimit për transportin e gardianëve, janë evidentuar shkelje ligjore. Më konkretisht, drejtori Judmir Shurdhi ka ngarkuar të njëjtët persona si anëtarë të Njësisë së prokurimit dhe Komisionit të vlerësimit të ofertave si dhe ka ushtruar presion ndaj vartësve për favorizimin e një operatori transporti.
Materialet procedurale i kaluan Prokurorisë Tiranë, për veprime të mëtejshme.
