Partia Demokratike ka depozituar ditën e sotme në Kuvend kërkesën për ngritjen e një komisioni hetimor per Trajtimin e të Dhënave Personale në Bazat e të Dhënave Shtetërore.
Kërkesa e PD-së vjen pas ngjarjes së fundit, vjedhjes së të dhënave të sistemit TIMS në Policinë e Shtetit, teksa është firmosur nga 45 deputetë të opozitës.
Kërkesa u depozitua në kryesinë e Kuvendit nga deputeti i PD dhe njëkohësisht edhe anëtar i Komisionit të Sigurisë, Ervin Salianji, i cili në një deklaratë për mediat u shpreh se ndërhyrja në sistemin TIMS, përveç mbrojtjes së të dhënave personale, ngre dhe problematikën e rendit dhe të sigurisë në këtë vend, pasi këto të dhëna mund të bien në duart e elementëve kriminalë
“Skandal mbi skandalet është rrjedhja apo tentativa për të manipuluar sistemin TIMS, tentativa për ta çuar në një pjesë të jashtme, të gjithë të dhënave të sistemit TIMS, apo akoma më keq ndërhyrja në të, fshirja e të dhënave, apo ndihma që mund t’i jepet grupeve kriminale, apo zyrtarëve të korruptuar, pasi këto të dhëna janë përdor nga SPAK në hetime të kaluara.
Ndërhyrjet e paligjshme në sistemin TIMS mbetet ndër ngjarjet më të rënda që kërkon ndërhyrjen e parlamentit, për të cilat AMP bëri një kallëzim penal ndaj forcës operacionale. Sot publiku është njohur nëpërmjet një deklarate të Prokurorisë se ky kallëzim ishte i paplotë dhe prokuroria po kërkon për këtë çështje të dhëna të plota. Imagjinonin tani që hetimin për këtë çështje në Policinë e Shtetit e drejton Ardi Veliu, një person i damkosur, si një prej njerëzve që manipulon ngjarje kriminale, ku e fundit ishte ajo e ngjarjes së Elbasanit.
Çështja e TIMS ka marrë edhe vëmendjen e ambasadës amerikane, pasi përfaqësuesi i tyre gjatë një takimi me ministrin e Brendshëm, shprehu shqetësimin e SHBA në lidhje më ndërhyrjen në sistemin TIMS në Policinë e Shtetit dhe kërkoi hetim të shpejtë dhe të gjithanshëm, duke theksuar rëndësinë që ka mbrojtja e të dhënave vetjake sensitive, përfshirë dhe të qytetarëve amerikanë në Shqipëri.
Ndërhyrja në sistemin TIMS, përveç mbrojtjes së të dhënave personale, ngre dhe problematikën e rendit dhe të sigurisë në këtë vend, pasi këto të dhëna mund të bien në duart e elementëve kriminalë.” – u shpreh Salianji.
