Një 32 vjeçar është arrestuar ditën e sotme në Portin e Durrësit,pasi tentoi të fuste armë në Shqipëri.
Blutë bëjnë me dije se në pranga ka rënë shtetasi Sindrit Kola, pasi gjatë kontrollit i janë gjendur 2 armë zjarri pistoleta, krehra dhe fishekë, si dhe 3 bombola metalike.
“Si rezultat i informacioneve të siguruara, se një shtetas që po udhëtonte me traget, nga Ankona në Durrës, kishte armë zjarri që tentonte t’i fuste në vendin tonë, u finalizua faza e dytë e operacionit policor të koduar “Rezidenti”, në kuadër të të cilit, në hyrje të RSh-së, u kap në flagrancë dhe u arrestua shtetasi S. K., 32 vjeç, banues në Lezhë dhe rezident në Itali.
Gjatë kontrollit, shërbimet e Policisë i gjetën këtij shtetasi, të fshehura në valixhe, si dhe i sekuestruan me cilësinë e provës materiale, 1 armë zjarri pistoletë, 1 armë me trup plastik, 2 krehra pistolete, 1 kuti me 50 fishekë imitues të zhurmës dhe 3 bombola metalike”,- njofton Policia.
Materialet proceduriale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme, për veprën penale “Trafikimi i armëve dhe i municionit”.
