Rapsodi nga Drenica, Nuredin Gashi, është personi i arrestuar nga policia e Kosovës, i cili dyshohet se ka kërcënuar me jetë kryeministrin e Kosovës, Albin Kurti.
Ai e ka kërcënuar me vdekje kryeministrin Kurti përmes një postimi në rrjetin social “Facebook”. Nuredin Gashi u vu në pranga me urdhër të Prokurorisë Speciale për shkak se kërcënimet në adresë të kryeministrit kosovar i ripërsëriti dhe në një emision televiziv në Kosovë mbrëmjen e 30 gushtit.
Madje në youtube ekziton dhe një këngë me çifteli e rapsodit nga Drenica, e publikuar tre vite më parë, ku sërish ai kërcënon Albin Kurtin. Në mbishkrimin e videos Gashi shkruan se: “Kush tradhëton atdheun e vetë e pret pushka me fishekë”.
“Me urdhër të Prokurorisë Speciale të Republikës së Kosovës (PSRK), Policia e Kosovës, ka arrestuar sot të dyshuarin me inicialet N.S. për shkak të dyshimit të arsyeshëm se ka kryer veprën penale ‘’Dhuna ndaj përfaqësuesve të lartë të Republikës së Kosovës’’ nga neni 121 të KPRK-së. Prokuroria Speciale njofton se i dyshuari N.S. ka bërë kanosje të dhunës për vrasje ndaj Kryeministrit të Republikës së Kosovës, pasi që ka bërë një postim në rrjetin social “Facebook’’ me përmbajtje inkriminuese, si dhe, gjatë transmetimit të drejtpërdrejtë të emisionit “DEBAT PLUS’’, të datës 30 gusht 2023, të njëjtën deklaratë i njëjti e përsëritë”, thuhej në njoftimin e Prokurorisë.
Sipas Kodit Penal të Republikës së Kosovës, saktësisht Nenit 128, kryerja e kësaj vepre dënohet me burgim nga tre deri në dhjetë vjet.
“Kushdo që me qëllim të rrezikimit të rendit kushtetues apo sigurisë së Republikës së Kosovës, me përdorim të dhunës apo me kanosje të dhunës, pengon një apo më shumë nga personat e saktësuar në nenin 126 të këtij Kodi në ushtrimin e detyrave zyrtare apo i detyron të kryejnë apo të mos kryejnë ndonjë veprim nga fushëveprimi i detyrave të tyre, dënohet me burgim prej tre (3) deri në dhjetë (10) vjet”, parashihet me Kodin Penal.
