Gjykata e Fierit vendosi arrest me burg Albi Meçinin, 29-vjeçarin e arrestuar dje në aksin rrugor “Mbrostar-Fier” lidhur me dyshimet se po përgatiste një atentat.
Policia sekuestroi 2 çanta brenda të cilave ishin 2 pako me rreth 21.3 kilogramë lëndë plasëse artizanale, të montuara me celularë, për shpërthim në distancë. Te dyja çantat u gjetën në afërsi të automjetit që sipas bluve, përdorej nga Meçini. Gjithashtu, nga kontrolli i zonës ku u kap 29-vjeçari me banim në Kamzë, u gjet një tjetër automjet në brendësi të të cilit ishin 3 bidona me lëndë djegëse benzinë. Nga veprimet hetimore rezulton se 29-vjeçari, në bashkëpunim me Arafat Manërkollin, 27 vjeç, banues në Dibër dhe Ervis Cukalin, 25 vjeç, banues në Tiranë (të cilët u shpallën në kërkim), kishin siguruar kushtet dhe mjetet, me qëllim kryerjen e një atentati.
Policia sekuestroi 2 automjetet, 2 çantat me rreth 21.3 kg lëndë plasëse artizanale, e montuar me celularë, për shpërthim në distancë, 3 bidonë me benzinë dhe 4 celularë.
Albi Meçini, sipas hetimeve, rezulton i përfshirë edhe në rrëmbimin e dy personave në Sarandë disa muaj më parë dhe ndaj tij ka një masë sigurie arrest me burg në mungesë për këtë çështje.
“Në vijim të veprimeve hetimore të kryera nga Policia e Fierit, në bashkëpunim me Policinë e Vlorës, në funksion të një procedimi penal të iniciuar nga DVP Vlorë, për zhdukjen e shtetasve Leonard Thodhori dhe Fatmir Sulovari, zhdukje e raportuar në Policinë e Sarandës, më datë 09.04.2023, rezultoi se shtetasi i arrestuar në flagrance, me çantat me lëndë plasëse, është autor i dyshuar për këtë rast, së bashku me shtetasin Sebastian Lataj, 25 vjeç, i cili u shpall në kërkim”, njoftoi policia.
Për Meçinin dhe Latajn, ditën e djeshme, Gjykata e Sarandës caktoi në mungesë masën e sigurisë “Arrest në burg” për veprën penale “Rrëmbimi ose mbajtja peng e personit”.
Albi Meçini rezulton i dënuar më herët për dhënie ndihmë 4 personave (Admir Tafili, Fran Marashi, Gëzim Gora, Artur Gora) për largim nga burgu i Drenovës – ngjarja e bujshme e ndodhur në nëntor të 2013-ës.
