Në Gjykatën e Juridiksionit të Përgjithshëm të Apelit në Tiranë po zhvillohet seanca për shqyrtimin e masave të sigurisë të të arrestuarve në çështjen e evazionit fiskal ndaj kompanisë së naftës “Bankers Petroleum”.
Personat e arrestuar kanë apeluar masat e sigurisë që ishin vendosur nga Gjykata e Fierit më 5 korrik.
Drejtori i Përgjithshëm i Bankers, shtetasi kinez Hong Ping Xiao, dhe ish-drejtori Leonidha Çobo kanë masë sigurie “arrest në burg”. Pesë persona të tjerë ndodhen në arrest shtëpie, ndërsa 3 të tjerë janë në detyrim paraqitje dhe ndalim daljeje jashtë vendit.
Seanca ka nisur paradite dhe pritet të zgjasë për shkak të numrit të madh të të arrestuarve që kanë apeluar masat.
Të pandehurit mohojnë lidhjen me akuzat dhe kërkojnë rishikimin e masave të sigurisë në forma më të lehta.
Gjykata e Fierit kishte vendosur 14 masa sigurie në total, prej të cilave 10 janë zbatuar, ndërsa 4 persona janë ende në kërkim.
Aksioni në “Bankers Petroleum” erdhi pas hetimeve që tregojnë se kompania, e cila prej më shumë se 20 vitesh nxjerr naftë në zonën e Patos-Marinzës, ka shmangur detyrimet tatimore për një periudhë të gjatë.
Sipas prokurorisë, kompania ka përdorur skema për të fshehur të ardhurat, duke deklaruar gjatë këtyre viteve humbje totale prej 11.7 miliardë lekësh, ndërkohë që ka eksportuar apo shitur naftë në vlerë prej 532 miliardë lekësh. Në këtë mënyrë, ka shmangur pagesën e taksave, duke përfituar edhe rimbursim TVSH-je.
