Nga Boldnews.al
Një nga problematikat më të hasura në kryeqytet është trafiku i rënduar. Megjithëse institucionet shtetërorë, administrata apo edhe shkollat janë pushim, sërish pjesa më e madhe e akseve është në trafik, duke rënduar kostot e qytetarëve për të lëvizur.
Por, kjo s’e ka penguar kryetarin e Bashkisë së Tiranës Erion Veliaj që të bëjë tendera të kotë. Bashkia s’ka asnjë plan për të rregulluar këtë fenomen, duke vendosur edhe masa. Por, çfarë bëjnë këta zyrtarë?! Realizojnë tendera vetëm për monitorimin e trafikut. Një tender i bërë edhe vitin e kaluar, por që në vitin 2023 i është dyfishuar vlera. Por nëse do ta monitorojë, si do t’i lajmërojë banorët që x apo y rrugë apo aks ka trafik? Një gjë e tillë s’ka ndodhur vitin e kaluar dhe s’ka për të ndodhur edhe në 2023-shin, teksa e vetmja gjë që dihet është se do të shpenzohen rreth 400 mijë euro vetëm për monitorimin.
Shpallja e njoftimit të tenderëve në 2022 dhe 2023 për monitorimin online të trafikut në Tiranë, ku vlera u dyfishua
Para pak ditësh, Bashkia e Tiranës ka lajmëruar Agjencinë e Prokurimit Publik se ka në plan të bëjë një tender për të monitoruar trafikun në kryeqytet. Objekti i procedurës së prokurimit është “ofrimi i shërbimit online për monitorimin e trafikut urban në Bashkinë e Tiranës”. Fondi limit i kësaj procedure është 41.666.667 lekë, ose mbi 400 mijë euro. Procedura do të bëhet në muajin shtator, teksa bëhet fjalë për rrjet internet dhe rrjet intranet.
Po në vitin 2022 a është bërë një tender i ngjashëm?! Sipas dokumenteve që disponon redaksia e BoldNews.al, Veliaj ka bërë një tender të ngjashëm edhe një vit më parë. Objekti është i njëjtë “ofrimi i shërbimit online për monitorimin e trafikut”. Në vitin 2022 tender kishte një vlerë sa gjysma e këtij aktuali, pra 200 mijë euro. Fitues është shpallur kompania “ALBTELECOM” me një vlerë 18.676.960 lekë. Dy firmat e tjera që garuan i s’kualifikuan.
Por, pavarësisht se për dy vite janë hedhur mbi 600 mijë euro, a do të rregullohet trafiku në kryeqytet? A mjafton vetëm monitorimi apo ndonjë masë tjetër? Duket se paratë vetëm sa qarkullojnë, pasi trafiku do të ekzistojë në Tiranë, për aq kohë sa rrugët janë bllokuar, janë zvogëluar dhe ndërtimet shumëkatëshe po shtohen dita-ditës!
