Nga Bold News.al
Pak javë më parë, deputetit socialist, Rrahman Rraja, dha dorëheqjen nga mandati. Shkak u bë dhuna shtazarake që djali, vëllezërit e tij dhe disa kushërinj, ushtruan mbi dy anëtarë të fisit Maja, për shkak të zhurmës që bënte gurorja në pronësi të familjarëve të ligjvënësit.
Rrahmani nuk kishte përgjegjësi direkte ligjore, pasi ai nuk ishte përfshirë në rrahjen barbare me shkopinj.
Por, ai kishte plot përgjegjësi në atë ngjarje, pasi familjarët e tij kanë “thithur aureolën e pushtetit të deputetit” për të vendosur hegjemoninë e forcës fizike dhe financiare në Krujë e Fushë-Krujë.
Pushteti politik i Rrahmanit i shndërroi familjarët dhe fisin e tij në gangsterë të zonës, në një lloj kaubojsish, të cilët vendosën nën diktat banorët.
Në këto kushte, Rrahman Rraja dha dorëheqjen “për moral”.
Nuk ka rëndësi nëse dorëheqja ishte e imponuar apo vullnet i lirë i Rrahmanit. Qëndrimi i tij vendosi një standart, atë të dorëheqjes së zyrtarit të lartë, kur familjarët e afërt përfshihen në krime të rënda, siç mund të konsiderohet “plagosja e rëndë me dashje” që rëndon mbi të paktën 8 Rrajat & friends.
Së fundmi, përsëritet sërish një ngjarje e rëndë, me protagonist familjarin e afërt e një zyrtareje të lartë të sistemit të drejtësisë.
Rei Meta, djali i anëtares së Këshillit të Lartë të Prokurorisë, Nurihan Seiti (Meta) goditi për vdekje në Vlorë inxhinjerin Armando Meshau.
Të dhënat e deritanishme flasin se 33-vjeçari Meta përdorej si “sekser” për të shuar debatet mes biznesmenëve, duke përdorur emrin e nënës së tij të pushtetshme, Nurihan Seiti, e cila ka detyrë të kontrollojë punën e prokurorëve.
Nurihani e KLP-së, njëlloj si Rrahmani i Edi Ramës, nuk ka përgjegjësi të drejtëpërdrejtë ligjore në vdekjen e 51-vjeçarit Meshau.
Megjithatë, njëlloj si Rrahmani, ajo ka përgjegjësi “morale”, pasi djali i saj ka përdorur emrin e nënës për të bërë “sekserin” e, rrjedhimisht, për të siguruar përfitime personale, megjithëse zyrtarisht figuron si punonjës në Drejtorinë e Doganave në Tiranë.
Madje, ajo ka më shumë përgjegjësi “morale” se sa Rrahmani, pasi pasoja e ardhur nga veprimet e djalit të saj (vdekja e Meshaut) është shumë herë më e rëndë se sa plagosja e rëndë e anëtarëve të familjes Maja nga “ushtria” e Rrahmanit.
Rrahmani vendosi “standartin” dhe dha dorëheqjen “moralisht”. A do të jetë në gjendje edhe Nurihani të ndjekë të paktën standartin e Rrahmanit dhe të largohet nga Këshilli i Lartë i Prokurorisë, për “moral”?