Kreu i PD-së, Sali Berisha ka zhvilluar këtë të hënë një takim në selinë blu me Agim Rexhën, Presidentin e Nderit të Federatës Pan-Shqiptare të Amerikës, Vatra
Teksa ka publikuar në rrjetet sociale disa foto nga takimi, Berisha shkruan se kanë biseduar “për shumë çështje që kanë të bëjnë në ruajtjen e tërësisë tokësore të Republikës së Kosovës, konsolidimin e pavarësisë së saj dhe proceset demokratike zgjedhore të dëmtuara rëndë nga një grup anti-demokratik që e sundon sot Shqipërinë”.
Postimi i plotë:
Takim me z. Agim Rexha, Presidentin e Nderit të Federatës Pan- Shqiptare të Amerikës, VATRA.
Të dashur miq, sot prita në një takim të përzemërt z.Agim Rexhaj, President Nderi i Federatës Pan-Shqiptare të Amerikës VATRA, një aktivist i shquar i çështjes sonë kombëtare.
Në takim unë i shpreha atij dhe Vatrës mirënjohjën e pakufijshme të Partisë Demokratike për rolin dhe mbështetjen e tyre të çmuar ndaj demokracisë në Shqipëri dhe zgjidhjes së çështjes së Kosovës, çlirimit të saj.
Zoti Rexhaj, nuk ka pushuar kurrë së punuari aq sa për Kosovën prej ku ka lindur, po aq edhe për Shqipërinë gjatë tërë jetës së tij, e veçanërisht në vitet e jetës së tij në Shtetet e Bashkuara të Amerikës, që nga vitet ‘80, si aktivist i VATRËS, i Lidhjes Qytetare Shqiptaro – Amerikane, drejtuar nga ish Kongresmeni Amerikan me origjinë arbëreshe Joseph DioGuardi, i Lidhjes Demokratike të Kosovës që kur u themelua ajo nga Presidenti tanimë I ndjerë, Dr. Ibrahim Rugova.
Biseduam me z.Rexha për shumë çështje që kanë të bëjnë në ruajtjen e tërësisë tokësore të Republikës së Kosovës, konsolidimin e pavarësisë së saj dhe proceset demokratike zgjedhore të dëmtuara rëndë nga një grup anti-demokratik që e sundon sot Shqipërinë.
Si përherë, takimet me Vatranët, dhe veçanërisht me drejtuesin e saj veteran, ish-nënkryetar për shumë vite, dhe tani President Nderi i VATRËS, z. Agim Rexhaj, janë të një kënaqësie të veçantë. sb
