Nga Boldnews.al
Pëllumb Gjoka, i arrestuar në orët e para të së Enjtes në Shkodër, rezulton se ka ngritur një perandori biznesi, ndërkohë që mbi të janë hedhur shpesh akuza publike për përfshirje në trafik narkotikësh.
Gjoka dhe disa persona të tjerë u vendosën në pranga, në kuadër të një operacioni të zhvilluar nga Struktura e Posaçme Anti-Korrupsion (SPAK) në bashkëpunim me autoritetet italiane.
Deri në publikimin e këtij shkrimi, nuk janë bërë publike të dhënat e operacionit dhe për çfarë akuzohen personat e arrestuar, ndër të cilët edhe ish-Shefi i Forcave Operacionale Policore, Oltian Bistri dhe kryeprokurori i Kukësit, Xhevahir Lita.
Megjithatë, të dhënat zyrtare dëshmojnë se Pëllumb Gjoka rezulton një biznesmen i fuqishëm në fushën e ndërtimeve dhe në atë të lojërave të fatit. Lejet dhe licensat i janë siguruar nga kryeministri Edi Rama dhe qeveria e tij.
Partitë opozitare dhe sidomos Sali Berisha e kanë akuzuar shpesh biznesmenin Gjoka si të përfshirë në trafikun e lëndëve narkotike të forta dhe se ka blerë vota për Partinë Socialiste në qarkun e Shkodrës dhe për këtë arsye kreu i qeverisë e ka shpërblyer me leje e licensa speciale.
Berisha i përmendi akuzat ndaj Gjokës edhe në përfundim të zgjedhjeve lokale të 14 Majit 2023, ku theksoi se biznesmeni bleu vota për kandidatin socialist për kryebashkiak të Shkodrës, Benet Beci.
“Perandoria” e Pëllumb Gjokës
Aktiviteti privat i Pëllumb Gjokës ka nisur në vitin 2001, kur regjistroi kompaninë e tij të ndërtimit “Ada Velipojë”.
Në vitin 2010, Pëllumb Gjoka regjistron shoqërinë “Imperial Group”, me aktivitet lojërat e fatit, hoteleri, e të tjerë.
Pas vitit 2014, që përkon me ardhjen në pushtet të Edi Ramës dhe socialistëve, Gjoka zgjeron ndjeshëm bizneset e tij.
Në vitin 2014, ai regjistron kompaninë “Lot Boutique Hotel”, duke ndërtuar edhe një godinë hoteliere shumë pranë qendrës së Tiranës.
Në këtë godinë, por në kuadër të shoqërisë “Imperial Group”, Pëllumb Gjoka siguron edhe një leje për ushtrimin e aktivitetit të lojërave të fatit-kazino, me emrin “Imperial Casino”.
Në vitin 2016, Pëllumb Gjoka krijon kompaninë “Imperial C. Construction”, me objekt të aktivitetit të saj shit-blerje pasurish të paluajtshme, ndërmjetësime, e të tjerë.
“Investitor strategjik”
Në 15 Korrik 2021, Komiteti i Investimeve Strategjike, nën drejtimin e kryeministrit Edi Rama, miratoi statusin e investitorit për projektin “Silver Sand Resort”, Subjekti aplikues është “Imperial Group”, në pronësi të Pëllumb Gjokës, si edhe Lekë e Alida Gjokës.
Sipas vendimit të nënshkruar nga Edi Rama, kompania e Gjokës merr përsipër që të shpenzojë 52 milionë euro, për ndërtimin e dy strukturave hoteliere dhe një numër të konsiderueshëm apartamentesh e viletash, në zonën e bregut të Velipojës, në Shkodër.
Sipas vendimit, projekti parashikohet të zhvillohet në Zonën Kadastrale 3072, Bashkia Shkodër, në një sipërfaqe totale prej 113.500 m2, pronë private, ku strukturat do të zënë një sipërfaqe afërsisht 14.496 m2.
