Kreu i grupit parlamentar të PD-së së vulës, Gazment Bardhi, pas mbledhjes së grupit, ka deklaruar për mediat se kanë vendosur që të kërkojnë interpelancë urgjente ditën e enjte me kryeministrin Edi Rama në lidhje me aferën e inceneratorëve, ku së fundmi është shpallur një urdhër-arresti për ish-zv.kryeministrin Arben Ahmetaj.
bardhi deklaroi se në mënyrë urgjente kryeministri duhet së parë të japë llogari për procedurat e paligjshme në të treja koncensionet dhe të informojë opinionin si financohet arratia e tre mafiozëve të inceneratorëve me paratë e buxhetit të shtetit
“Grupi parlamentar ka depozituar kërkesën për të thirrur të enjten si pikë të parë të rendit të ditës, në interpelancë urgjente kryeministrin Edi Rama lidhur me aferën e inceneratorëve. Opinioni është tronditur nga faktet që SPAK ka zbuluar në raport me zv/kryeministrin Arben Ahmetaj, ndërsa cështja e tij personale, pra përgjegjësia penale e tij tashmë është cështje e drejtësisë, prokurorisë dhe gjykatës. Në mënyrë urgjente kryeministri duhet së parë të japë llogari për procedurat e paligjshme në të treja koncensionet dhe të informojë opinionin si financohet arratia e tre mafiozëve të inceneratorëve me paratë e buxhetit të shtetit. Edhe pse në kërkim, vijojnë të marrin para nga buxheti i shtetit. Kërkesa për interepelancë urgjente është e detyrueshme, kryeministri duhet të jetë në seancë të enjtes.
Së dyti, sic jeni në dijeni, ka një kërkesë të një grupi deputetësh për mocion me debat, gjej rastin t’i bëj thirrje Nikollës për ta shqyrtuar kërkesën në mbledhjen e konferencës së kryetarëve. Çështja e tretë, është si po shkelet rregullorja për të futur të enjten në votim një ligj të kërkuar nga grupet kriminale sic është ai për kanabisin. Është kërkesë e grupeve kriminale, jo e qytetarëve.” -u shpreh Bardhi, ndërsa theksoi se nuk do të lejojnë seancë me të deleguar të kryeministrit.
“Kërkesa është drejtuar ndaj Ramës, është detyrim i tij të paraqitet, nuk kemi kërkuar interpelancë me hije të tij. Është ai që ka fuqinë për të vënë në lëvizje të gjithë mekanizmin shtetëror për këtë aferë. Nuk do lejojmë interpelancë me të deleguar.“ vijoi më tej Bardhi.
Vlen të theksohet fakti se edhe PD ditën e premte i ka dërguar kryetares së Kuvendit, Lindita Nikolla një kërkesë për mocion me “debat publik URGJENT” në Parlament në lidhje me aferën e inceneratorëve.
PD kërkoi futjen si çështje e parë në rendin e ditës në seancën plenare të datës 20 Korrik ,të mocionit me debat rreth skandalit të inceneratorëve ku nga informacionet e bëra publike, përveç ish zv. kryeministrit Ahmetaj janë të përfshirë edhe ministra të tjerë aktualë, ish-ministra, deputetë e funksionarë të tjerë të lartë. Sipas PD, çdo deputet duhet të ketë të drejtën e diskutimit 10 minuta dhe se lista e folësve për Mocionin me Debat të fillojë detyrimisht me deputetët iniciues të Mocionit me Debat dhe më pas mund të vijojnë folësit apo diskutantët e tjerë.
Kujtojmë se të premten Kuvendi miratoi kërkesën e SPAK për arrestimin e deputetit të PS, Arben Ahmetaj. Por, ky i fundit ndodhet në arrati jashtë territorit të Republikës së Shqipërisë. Sipas avokatëve të Ahmetajt, ai ndodhet në Britani dhe do të kthet vetëm kujr të ketë fituar lirinë.
