Nga Boldnews.al
Më 7 korrik dy ishin ngjarje të rëndësishme. Teksa njëra ndodhi dhe po shihej publikisht, tjetra po ndodhte, ndoshta për të mbuluar atë që ndodhi… Video e dhunës së fisit Rraja nga Nikla e Fushë-Krujës ndaj dy qytetarëve të pambrojtur ishte tema e ditës dhe shfryrja publike se krim-pushteti nuk po njihte më limit. Djali, vëllezërit dhe nipërit e deputetit socialist, Rrahman Rraja, filmuan veten teksa maskronin me shkopinj bejzbolli dhe qyta pistolete dy kushërinjë Jashar dhe Bilbil Maja që ishin ankuar se gurorja e Rrajave po u prishte banesat nga shpërthimi i ekplozivëve.
Dhunë e pushtetit me një film që tregonte se ishin aq të paprekshëm dhe që mbroheshin nga policia dhe qeverisja, saqë filmonin veten teksa rrihnin qytetarët. Lideri i madh, kryeministri Edi Rama, ndodhej për vizitë nëpër ballkan, në turin e tij për të folur për paqe, demokraci dhe mirëqenie kudo në botë. Ai u trazua jo pak kur si mjeshtër i rrjeteve sociale pa sesi qytetarët këtë herë ishin fort të revoltuar. Veprimi që bëri ishte shkarkimi i Ministrit të Brendshëm Bledi Çuçi dhe urdhërimi që edhe deputeti Rrahman Rraja të jepte dorëheqjen, duke i servur një mesazh të gatshëm që gjithsesi nuk ishte hartuar aq bukur nga të përhershmit që vijnë nga zyra e “FUG(K)SAVE”-ve të tij.
As kaq nuk mjaftonte. Skandali duhet mbyllur me skandal, njësoj si plumbi që del me plumb. Kush më mirë se një “institucion i pavarur” në letra mund të shërbejë si dorë që tërheq kryeministrin nga një hendek jo i vogël? SPAK-u e vërtetoi edhe një herë si shumë herë që të tregon ligjin atëherë kur duhet të mbyllet një gjurulldi. Vetëm Ai, “i madhi lider” të mos ndihet keq.
Po më datë 7 korrik, kur njerëzia shihte pafund rrahjet e Rrajave të Rilindjes së Ramës, kreu i SPAK firmosi kërkesë-arrestin për ish-zëvendëskryeministrin dhe Ministrin e Financave, Arben Ahmetaj, aktualisht deputet. Ka mjaftuar ky lajm i madh që të zbehë ca dajakun e Rrajave të Rilindjes. Në një lloj forme SPAK-u e “rrahu mirë” Ahmetajn, duke e kthyer nga një “tigër” në një shtëpiake mjaullinëse.
Mbi Ahmetajn rëndojnë tre akuza. Ai tre javë më parë u mor në pyetje nga SPAK dhe për të thuhej se po beheshin gati prangat, vetëm koha pritej. Disa e mendonin se do e nisnin me të në shtator pasi të kalonin këto muaj vere, por koha u përshpejtua. Bash e më 7 korrik u shfaqën dy filma të frikshëm. I pari u “shijua” nga publiku teksa Rrajat ishin protagonistë, ndërsa “filmi” i dytë duket se më parë u shijua nga “udhëheqja” dhe më pas t’i jepet publikut për të bërë komentet. “Si e hengri Ahmetaj; çfarë do ndodhë me të; si do ja heqin imunitetin; çfarë do deklarojë për të “lideri i madh”; tek cila qeli do e dërgojnë”?-këto e shumë të tjera janë pyetjet e publikut që duket i shashtisur, sikur e ka goditur huri i Rrajave.
Ama ka ende kohë për skandale të tjera që do mbulohen nga “drejtësia e pavarur” e cila tashmë ka një qëllim patriotik për tu shkrirë në një strukturë propagandistike e cila lëmon “liderin global”. Po ashtu publiku me barkun bosh, do ngopet me patetizmat e majës së qeverisë teksa do të shtojnë dozën se janë aq qelibar saqë po dorëzojnë të vetët në burg. “Kushdo që ka ngrënë dardha pas kurrizit tim le të përgjigjet”-tha Rama disa muaj më parë. Tashmë lista është me ata që kanë ngrënë “gorrica”, pasi dardha e madhe është në dorën dhe gojën e tjetërkujt. Një i madh, shumë i madh…! Rrajat në një lloj forme me hurin e “drejtësisë së re” rrahën pa dashje edhe ish-zëvendëskryeministrin.
