Ish-futbollisti i njohur shkodran, Roland Luçi, ka bërë një postim në rrjetet sociale duke sulmuar idenë e hedhur nga FSHF rreth ndryshimit të formulës së kampionatit me një “faze finale me grumbullim në Tiranë” ku të gjithë ndeshjet që vendosin titullin e Euriopën të luhen në “Air Albania”.
Me ironi, Luçi ka propozuar që i gjithë kampionati të luhet në Tiranë, me që aty ka më shumë shikueshmëri për të gjithë.
“FSHF propozon një format të ri të kampionatit me një play off të katër skuadrave të para. Këto ndeshje të luhen në Tiranë, sepse duken si derby, thekson FSHF dhe kështu u rritkan të ardhurat dhe interesi i spektatorëve. Sikur mes këtyre të katërtave të mos jetë asnjë skuadër e kryeqytetit, nuk e përmend kush, nënkuptohet se 3 të tilla duhet të jenë patjetër e në rast nevoje e zgjidh kolegjiumi i arbitrave me sa duket…
Me këtë logjikë lind një pyetje tjetër logjike, se pse nuk luhen në Tiranë të gjitha ndeshjet e kampionatit që të ketë më tepër “derby” pra, dhe sigurisht më tepër të ardhura për klubet, sipas llogarisë që ka bërë fëshëfëja?
Varu lesht Shkodrës, Korçës, Vlorës, Ballshit a Laçit, vetëm në Tiranë duhet zhvilluar kampionati që t’i vijë arome derby anglez e jo katundarizmi provincial!
PS: Se çfarë quhet “derby” duhet dikush t`jua shpjegojë fëshëfëistëve!”, shkruan Luçi në postimin e tij në Facebook.
