Kryetari i Partisë së Lirisë, Ilir Meta, ka reaguar lidhur me ngjarjen në Krujë, ku fisi i deputetit socialist Rrahman Rraja, dhunoi brutalisht dy persona të fisit Maja.
Përmes një postimi në rrjete sociale, Meta shprehet se kjo ngjarje është “fytyra e Edi Ramës dhe regjimit kriminal”, ndërsa shton se palë me krimin është bërë edhe policia.
Ndër të tjera Meta bën thirrje që ngjarja të zbardhet sa më shpejt dhe autorët të vihen para drejtësisë.
Reagimi i plotë:
Dhuna shokuese e Krujës kundër dy qytetarëve paqësorë ka emrin dhe fytyrën e Edi Ramës dhe regjimit kriminal që ai ka instaluar në çdo qelizë të shtetit dhe institucioneve të kapura.
Mosveprimi i Policisë të Shtetit dhe drejtësisë është kthyer në detyrim ndaj të fortëve të “Rilindjes”, që grabisin zgjedhjet për t’i zgjatur jetën një regjimi antiligjor dhe çnjerëzor që dhunon çdo ditë të drejtat dhe sigurinë e përditshme të të gjithë qytetarëve.
Hetimi i menjëhershëm i kësaj ngjarje tronditëse dhe vendosja përpara përgjegjësisë ligjore e autorëve të saj jashtë ndikimeve politike dhe presioneve të pushtetit është domosdoshmëri jetike për sigurinë e çdo qytetari!
