Tre persona kanë rënë në prangat e Policisë së Durrësit, këtë të Hënë pasi akuzohen për shitje të lëndëve narktotike.
Blutë bëjnë me dije se në pranga kanë rënë shtetasit: Renato Leci, 21 vjeç, Elvis Leci, 19 vjeç, (kushërinj) të dy banues në Arapaj, Durrës, si dhe shtetasi Endri Mëzhika, 22 vjeç, banues në Xhafzotaj, Durrës, pasi në bashkëpunim me njëri-tjetrin, shisnin kokainë në zonën e plazhit të Durrësit.
Ndërkohë janë sekuestruar në cilësinë e provës materiale një sasi lënde narkotike kokainë e ndarë në dhjetëra doza, një peshore elektronike dhe 3 celularë.
“Autoritetet e Policisë së Shtetit kanë finalizuar operacionin e koduar “Periudha”, duke goditur një grup të organizuar të shitjes së lëndëve narkotike.
Mësohet se grupi vepronte duke shitur doza kokaine në zonën e plazhit në Durrës, ndërsa në pranga kanë përfunduar 3 shtetas.
Gjatë operacionit janë sekuestruar një sasi lënde narkotike e ndarë në dhjetëra doza gati për shitje, si edhe një peshore elektronike dhe 3 celularë.
Në bazë të provave të siguruara, specialistët e Seksionit për Hetimin e Narkotikëve dhe Trafiqeve të Paligjshme të DVP Durrës, në bashkëpunim me shërbimet e Forcës së Posaçme “Shqiponja” të kësaj drejtorie, kapën dhe vunë në pranga shtetasit R. L., 21 vjeç dhe E. L., 19 vjeç (kushërinj), të dy banues në Arapaj, Durrës, si dhe shtetasin E. M., 22 vjeç, banues në Xhavzotaj, Durrës”,- njofton policia.
Sakaq, materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
