Nga Boldnews.al
Disa ditë më parë, redaksia e BoldNews.al publikoi një investigim për mënyrën sesi kryetari i Bashkisë së Korçë, Sotiraq Filo, po tentonte që të rehabilitonte firmën e pastrimit “Korsel”.
Kjo e fundit ishte skualifikuar për një kohë të gjatë nga pjesëmarrja në tendera, pasi kishte paraqitur dokumente të falsifikuara në një procedurë në Tiranës. Por, pavarësisht kësaj, kjo firmë vijonte operimin në Korçë, me një kontratë në fuqi që ka skaduar disa javë më parë.
Raqka i Korçës e shtyu në maksimum bërjen e tenderit të pastrimit, teksa vetëm disa ditë më parë hapi edhe procedurën me fond 4 milionë euro dhe me afat 3 vjeçar. Por, kur kaluan vetëm disa ditë nga shpallja e këtij tenderi, i njëjti kryetar dhe e njëjta bashki, kanë hapur një tjetër procedurë, bërjen e një tenderi të pastrimi emergjent.
Disa ditë më parë, Bashkia e Korçës bëri me shpejtësi një tender, me objekt procedure të prokurimit “shërbimi i pastrimit (emergjencë)”. Fondi limit i kësaj procedure është 31.605.651 lekë, ndërsa dokumenti i mësipërm është publikuarnë datën 8 qershor 2023. Bëhet fjalë për objektin “shërbime pastrimi” dhe me procedurë “ne negocim, pa njoftim”. Pra, Bashkia e Korçës do të negociojë me firmën për t’i dhënë shumën prej 300 mijë eurosh.
Por me cilën firmë? Natyrisht, të gjitha gjasat janë që këto para’ ti marrë firma “Korsel”, ajo e cila vijon operimin në atë qytet. Dhe, duke qenë se dokumentet e tenderit të madh u vonuan, i njëjti kryetar vepron me shpejtësi për të akorduar para’ shtesë, nga taksat që paguajnë banorët e Korçës.
Duke parë këto procedura, Raqka ka filluar me skemat, duke “kopjuar” paraardhësin e tij Niko Peleshi. Edhe Peleshi, aktualisht ministër i Mbrojtjes, ia ka dhënë tenderat e pastrimit firmës “Korsel” kur ka qenë kryetar i Bashkisë së Korçës, duke i lënë një “trashëgimi” edhe Sotiraq Filos.
Denoncimi i BoldNews.al i para disa ditëve me titull: “…Raqka i Korçës do të rehabilitojë firmën Korsel!”
BoldNews.al botoi disa ditë më parë një investigim për tenderat e pastrimit në Korçë, të cilët prej 11 vitesh, janë fituar nga firma “Korsel”. Por, në fillim të vitit 2022, kjo firmë u skualifikua për 18 muaj nga tenderët, pasi kishte paraqitur dokumente false në një procedurë tenderuese në Tiranë.
Që prej asaj kohe, “Korsel” ka qenë në hije, teksa ka vijuar me kontratat që ka pasur në fuqi, në Korçë, Sarandë, Elbasan etj. Sipas dokumenteve që publikoi BoldNews.al, Bashkia e Korçës ka hapur ditët e fundit procedurën e tenderit për pastrimin e qytetit. Fondi limit i kësaj procedure është plot 400.041.205 lekë pa TVSh, ose me TVSh plot 4 milionë euro.
Fillimisht, në vitin 2012 Peleshi i dha një tender me vlerë rreth 3 milionë euro me afat 5 vjeçar. Në vitin 2017 iu dha tenderi me vlerë 3.5 milionë euro sërish me afat 5 vjeçar, ndërkohë që në vitin 2023 janë hapur procedurat për tender me vlerë 4 milionë euro me afat 3 vjeçar. Por, a do të arrijë “Korsel” ta fitojë këtë vit, megjithëse u skualifikua?! Raqka i Korçës i ka kopsitur letrat e tenderit që vetëm kjo firmë të fitojë, fillimisht tenderin emergjent dhe më pas atë të madhin!
