Elita e futbollit shqiptar ka dhuruar spektakël në javën e parafundit, teksa Partizani i ka rrëmbyer vendin e parë Tiranës, vetëm një javë nga fundi i kampionatit.
Bardheblutë nuk shkuan më shumë se një barazim 2-2 në Rrogozhinë ndaj Bylisit.
Skuadra e Orges Shehit e nisi mirë takimin duke marrë avantazhin në minutën e 22-të, falë një kundërsulmi vrasës të finalizuar me sukses nga Hila.
Por, ballshiotët reaguan menjëherë, duke u kundërpërgjigjur me golin e barazimit. Përgjoni bëri një gabim fatal me një top të kthyer keq mbrapa, ndërsa Danladi realizoi një gol fantastik.
Episodi më i rëndësishëm i sfidës i takon minutës së 74-të, kur pas një ndërhyrje të Behiratches ndaj Kaçorrit, arbitri akordoi penallti për skuadrën nga Ballshi dhe u deshën disa minuta për konfirmimin nga VAR.
Nga pika e bardhë u tregua i saktë Adili. Skuadra e Shensoit u mbrojt mjaft mirë deri në fund dhe pavarësisht rasteve dhe 10 minutave shtesë, rezultati mbeti 2-2.
Nga ana tjetër, Partizani shkon vetëm një fitore larg titullit kampion, teksa mundi 1-4 Kastriotin në transfertë dhe merr kështu kryesimin e kampionatit.
Një e majtë e Grecës surprizoi të kuqtë në minutën e nëntë. Totalisht të shokuar, kryeqytetasit mund të pësonin golin e dytë në minutën e 22-të, por vetëm shtylla ndali krutanët.
Skuadra e Colellës vendosi zemrën në fushë dhe gjeti golin e ekuilibrit në fundin e fraksionit me Arinaldo Rrapaj dhe të përmbysjes me Da Silva.
Partizani futi ndeshjen në shinat e duhura në fillimin e pjesës së dytë, duke siguruar 3 pikët me golat e Murataj dhe Sotës. Entuziazmi është i madh në kampin e “Demave”, teksa në sfidën e fundit do masin forcat me Teutën.
Tirana renditet në vendin e dytë dhe mbyll kampionatin ndaj Erzenit në transfertë, ndërsa Partizani mat forcat përballë Teutës.
Klasifikimi:
