Në mesin e atyre që bëjnë analizat e votave të 14 Majit, se përse koalicioni Berisha-Meta humbi në mënyrë drastike përballë Ramës, është krijuar një llogore mes dy grupimesh që shohin dy shkaqe të ndryshme që dhanë rezultatin e 14 Majit.
Të parët i gjejnë rrënjët e humbjes tek manipulimi, tek shndërrimi i partisë në pushtet në një makineri presioni dhe shantazhi që përdor paratë e korrupsionit për të blerë vota. Që nga shpallja e Berishës “non grata”, tek rrëmbimi i vulës, refuzimi për ta financuar koalicionin opozitar me fondet e KQZ, mohimi i komisionerëve dhe numëruesve, kapja e mediave etj, janë arsye që tregojnë se rezultati final, ishte devijim i vullnetit të votuesve nën efektin e autokracisë.
Të dytët i gjejnë shkaqet në kënetëzimin e opozitës. Sipas tyre votuesit refuzuan retorikën e liderëve të koalicionit Berisha-Meta, që e kanë të pamundur të rishpikin vetveten sepse janë të vjetër, të konsumuar dhe që duhet të ishin dorëhequr kohë më parë. Si provë, jepet shifra e përafërt e rreth 230 mijë votave më pak se sa Berisha-Meta morën në 14 Maj, krahasuar me koalicionin Basha-Kryemadhi në zgjedhjet e dy viteve më parë. Pra, tek shifrat lexohet që votuesit e opozitës nuk dolën fare nga shtëpia.
Interesante është ndërhyrja e Edi Ramës në analizë. Gjatë takimit në Mat (të hënën 22 Maj), si pjesë e turit të falenderimit me votuesit e Partisë Socialiste, Rama u shpreh:
“Unë dua të falenderoj dhe ata që nuk dolën në votim, në fakt, sepse dhe ata, duke mos qenë në gjendje ta bëjnë kapërcimin dhe të vijnë të votojnë Partinë Socialiste, të vijnë të votojnë për kandidatët tanë, nuk bënë as tjetrën, nuk e ngarkuan veten, nuk e ngarkuan familjen e tyre, nuk e ngarkuan traditën e tyre të djathtë me turpin e një vote për “Bashkë Fitojmë” me Like Floririn. Unë i falenderoj dhe ata sepse duke i hequr një votë dhe në fakt i kanë hequr shumë vota atyre që dolën për t’i tërhequr zvarrë pas Berihait problemet e tyre personale, kontribuuan realisht në këtë rezultat” u shpreh Rama.
Me këtë falenderim të veçantë, ai i bashkohet shpjegimit që bën grupimi i analizuesve të cilët ia faturojnë humbjen bashkëpunimit Berisha-Meta. Sigurisht, nuk pritej nga Rama të çohej dhe të denonconte presionet ndaj zgjedhësve në 14 Maj. Kuptohet se kryeministri edhe kur bën analizë në sytë e publikut, vazhdon bën politikë.
Por fakti se ai rreshtohet mes atyre që i gjejnë shkaqet e humbjes tek dyshja Berisha-Meta, është tregues se kjo lloj narrative është muzikë për veshët e kryeministrit.
Pra, nëse supozojmë se mes zërave të arsyeshëm të opinionit publik mund të ndodhë një moment, që të ketë konsensus dhe të bihet dakort për variantin më të thjeshtë; që rezultati i 14 Majit u prodhua sa nga presioni i pushtetit, aq edhe nga oferta e vjetër e opozitarëve, sërish kjo nuk do t’i leverdiste Edi Ramës. Propagandës i duhet vetëm një shpjegim, prandaj dhe Rama i është bashkuar ta nxisë akoma më tej. Njësoj si prozhektorët mediatikë që i kontrollon vetë dhe që janë të fokusuar vetëm tek dobësitë e opozitës. Kështu, mbeten në hije mekanizmat që bllokuan një proces votimi të lirë dhe të ndershëm.
/Lapsi.al/
