Nga Boldnews.al
Gëzimi i fitores së mbështetësve të kandidatit opozitar të Himarës, Fredi Beleri, i cili gjendet prej ditësh nën masë arresti në burg, i dyshuar nga policia për “shitje votash”, mund të mos zgjasë shumë.
Kryeministri Edi Rama ka të gjitha mundësitë që ta shkarkojë nga detyra, ende pa e gëzuar mandatin e kryebashkiakut. Dhe, precedenti ekziston.
Në 24 Mars 2023, Këshilli i Ministrave vendosi të shkarkojë nga detyra kryebashkiakun socialist të Bulqizës, Lefter Alla, pasi ai u prangos nga Struktura e Posaçme Kundër Korrupsionit (SPAK), nën dyshimet se ka kryer vepra penale të “shkeljes së barazisë në tendera” dhe ‘shpërdorim detyre”.
Kryeministri Rama e argumentoi shkarkimin e Allës, duke u mbështetur në “shkronjën “a”, të nenit 62, të ligjit nr.139/2015, “Për vetëqeverisjen vendore””.
Çfarë thotë ky nen?
“Kryetari i bashkisë shkarkohet me vendim të Këshillit të Ministrave në rastet kur: a) kryen shkelje të rënda të Kushtetutës ose të ligjeve…”.
Vlerësimin për kryerjen e shkeljes së rëndë në këtë rast e kryen Ministri i Brendshëm.
Lefter Alla u shkarkua, pasi Këshilli i Ministrave konsideroi “shkelje të rëndë të ligjit” faktin që kryetari i Bashkisë së Bulqizës në detyrë u arrestua, nën dyshimet për kryerjen e veprave penale.
Pra, situata e Lefter Allës është e njëjtë me atë të Fredi Belerit, përballë qasjes së Këshillit të Ministrave të Edi Ramës.
Fredi Beleri, ashtu si Lefter Alla, është i arrestuar, nën dyshimet për kryerjen e veprës penale.
Lefter Alla konsiderohet ende i pafajshëm, për sa kohë nuk ka një vendim të formës së prerë. Po ashtu, edhe Fredi Beleri. Por Edi Rama e shkarkoi Lefter Allën, edhe pse deri më tani konsiderohet i pafajshëm.
Pra, nuk do të jetë aspak çudi që Rama ta shkarkojë Fredi Belerin për “shkelje të rëndë të ligjit”, duke çuar deri në fund fushatën e tij kundër kandidatit opozitar për Himarën, që nisi me fushatë të egër linçimi dhe më tej përdorimin e Policisë për arrestimin e tij.
