Dyer të mbyllura dyqanesh, dritare me shirita dhe tabela me mbishkrime të hequra në hyrje – gjithnjë e më shumë dyqane në Gjermani po vendosin kyçin, shkatërrimi i dyqaneve të vogla po vazhdon dhe numri i tyre po zvogëlohet. Sipas parashikimit të Shoqatës Gjermane të Tregtisë (HDE), rreth 9.000 dyqane shtesë do të mbyllin dyert këtë vit. Në Gjermani kanë mbetur edhe 311.000 prej tyre. Sa për krahasim: Në vitin 2015, kishte rreth 373.000 dyqane.
“Duke pasur parasysh shifrat e viteve të kaluara, sinjalet e alarmit duhet të aktivizohen në të gjitha qendrat e qyteteve dhe në politikë. Sepse pa një tregti të vogël të suksesshme, qendrat e qyteteve vështirë se kanë një perspektivë për të ardhmen”, paralajmëroi presidenti i Shoqatës Gjermane të Tregtisë, Alexander von Preen dhe shtoi: “Nëse vdes tregtia e vogël edhe qyteti do të vdesë”.
Korona solli shumë probleme
Fakt është se numri i dyqaneve në Gjermani ka kohë që është në rënie. Kjo ishte veçanërisht e theksuar gjatë viteve të koronës 2020-2022, kur numri i dyqaneve ra me 11.000 në vit. Vëmendja e publikut përqendrohet kryesisht tek mbyllja e dyqaneve të zinxhirëve të mëdhenj, si Galerie Kaufhof, dyqanet e këpucëve Görtz ose rrjeti i modës Gerry Weber.
Por shumica e mbylljeve sipas HDE janë dyqane të vogla si butikë apo furra buke. Blerja në internet është një nga faktorët kryesorë të kësaj gjendjeje. Përveç kësaj, gjatë koronës, edhe më shumë njerëz u mësuan të porosisin online. Shuarja e dyqaneve të vogla vërehet në lagjet jashtë qendrave të qyteteve të mëdha, por mbi të gjitha në qytetet më të vogla dhe të mesme, vëren shefi i HDE, Stefan Genth.
As blerësit nuk janë të kënaqur
Duke pasur parasysh ambientet e shumta afariste që janë zbrazur, HDE kërkon nga komunat një angazhim më të fortë dhe një ofensivë më të madhe për të ndalur rënien e numrit të dyqaneve. “Proceset jo-burokratike dhe të shpejta për dhënien e lejeve për rimodelimin dhe riemërtimin e hapësirave duhet të kenë përparësi,” tha presidenti i HDE von Preen. Nëse boshllëqet aktuale nuk plotësohen shpejt, kërcënon një reaksion zinxhir me një spirale në rënie, shtoi ai.
Megjithatë vetë klientët nuk janë më entuziastë për blerjet në qendrat e qyteteve gjermane ku dyqanet janë të përqendruara në zonat e këmbësorëve. Sipas një sondazhi të Institutit për Kërkime Tregtare (IFH) të kryer në fund të vitit të kaluar, çdo i dyti u përgjigj se nuk do t’ua rekomandonte miqve të tyre blerjet në qendër të qytetit. Të anketuarit karakterizuan vetëm çdo të katërtin qytet si tërheqës për blerje. “Fakti është se shumica e qendrave të qyteteve ku ka dyqane kanë më shumë kritikë sesa fansa”, tha drejtori i IFH, Boris Hedde. /DW
