Sipas Sali Berishës, Edi Rama dhe Yuri Kim kanë zbatuar një plan me qëllim zgjatjen e mandatit të ambasadores amerikane në vendin tonë.
Deklaratën, kryedemokrati e bëri këtë të mërkurë në një emision televiziv, duke iu referuar një përplasjeje mes Yuri Kim nga njëra anë dhe kryeministrit Edi Rama e kryediplomates Olta Xhaçka nga ana tjetër.
Në muajin dhjetor, në një njoftim të pazakontë, Ministria e Jashtme e drejtuar nga Olta Xhaçka deklaronte se kishin nisur procedurat e zëvendësimit të ambasadores amerikanë në Tiranë, Yuri Kim. Media shtetërore amerikane në gjuhën Shqipe “Zëri i Amerikës”, në një raportim më 14 Dhjetor, do të raportonte se deklarata ishte në shkelje të praktikave diplomatike.
Xhaçka do të deklaronte më pas se njoftimi erdhi pas teorive të komplotit me autor Berishën, që sipas saj kishin si qëllim përbaltjen e figurës së Yuri Kim.
Vetë ambasadorja reagoi në rrjetet sociale duke u shprehur se “do të qëndroj dhe ca më gjatë” se mandati që si rregull zgjat 3 vjet.
Përplasja u cilësua gjerësisht si një mosdakordësi mes Ramës dhe Kim për kreun e ri të SPAK.
Megjithatë, Berisha u shpreh sot se kjo përplasje kishte si qëllim shtyrjen e mandatit të ambasadores në vendin tonë.
“Shtyrjen e afatit të qëndrimit të saj këtu e holloi përmes një kurthi me Ramën dhe Xhaçkën. Rama dhe Xhaçka thanë se ambasadores i skadoi afati dhe do largohet. E vërteta është se ishte një bashkërendim që ajo ti thoshte eprorëve që ‘ç’janë këta shqiptarët, duan që të iki’. Por ambasadori i ri është emëruar lexova në media”, tha Berisha.
