Belind Këlliçi denoncoi këtë të Mërkurë që skemë përmes së cilës kryeinspektori Ndërtimor i Bashkisë së Tiranë Mariglen Qato ka përfituar miliona euro tendera, duke shfrytëzuar pozicionin e tij në kupolën e administratës.
Sipas Këlliçit, në qendër të skemës është një kompania 5D e zotëruar “de facto” nga Qato.
Përmes saj, u shpreh kandidati i opozitës në një deklaratë për mediat, Qato ka marrë dhjetëra miliona euro tendera nga Bashkia e Tiranës dhe institucionet në varësi.
Një tjetër përfitim, sipas Këlliçit, janë lejet e ndërtimit që ka marrë kjo kompani.
Ai shtoi gjithashtu se njerëz të afërt të Mariglen Qatos janë emëruar në postë të rëndësishme në administratën e Bashkisë së Tiranës.
Tenderat
Këlliçi solli në kujtesë se Qato, i cili sot është drejtor i inspektoriatit të mbrojtjes së territorit nga viti 2018 e në vijim, në vitin 2016 deri në vitin 2018 ka shërbyer si drejtues në UKT.
Kandidati i koalicionit Bashkë Fitojmë në Bashkinë e Tiranës tha se Qato, përmes kunatës së tij Elisabeta Cjapi (drejtoreshë finance në UKT), kontrollon financat e UKT-së.
Këlliçi shtoi më te tej se një të afërm tjetër – Taulant Cjapin e ka punonjës në bashkinë qendrore dhe të vëllain e tij e ka po punonjës në bashkinë qendrore.
“Ndërkohë Mariglen Qato përmes të vëllait të tij dhe të afërmve të lidhur drejtpërdrejt me vëllain e tij nga viti 2016 ka hapur një kompani të cilës në fakt i ka ndërruar 3 emrin. Që quhej fillimisht IGOR ELEKTRIK, më pas V.A.S konstruksion dhe tashmë është e famshmja 5D konstruksion, janë 5 drejtorët e bashkisë me të cilën, do të thoni ju çfarë ka problem, ka marrë plot 29 tendera në vlerën 25.16 mln euro pa TVSH.
Por nga i ka marrë këto tendera, se nuk është se ka bërë biznes të ndershëm. Këto tendera ky zotëri i ka marrë nga Bashkia e Tiranës, plot 15 të tilla në vlerën 10.5 mln euro. Nga UKT-ja ku ka qenë titullar dhe drejtues dhe ku ka familjarët e tij që drejtojnë financat ka marrë 10 tendera në vlerën 9.5 mln euro. Nga OSHEE ka marrë 3 tendera në vlerën 3.2 pothuaj mln euro dhe nga ARRSH-ja 1 tender në vlerën 1.89 mln euro”, u shpreh Këlliçi.
Lejet e ndërtimit
Më tej, ai foli për lejet e ndërtimit që ka marrë firma në fjalë.
“Ajo që dua të flas nuk ka të bëjë vetëm me vjedhjen e fondeve dhe taksave dhe lënien mënjanë të qytetarëve dhe lënien pa ujë të qytetit të Tiranës se këtë e vuajnë të gjithë qytetarët, por me faktin që makutëria e këtyre nuk njeh limite. Sot, këta jo vetëm që marrin tendera, por këta drejtues të administratës publike na janë bërë edhe biznesmenë të mëdhenj të ndërtimit dhe të betonizimit të Tiranës.
Kjo është një nga lejet që ka marrë Mariglen qato në dtë 5 Prill 2022 për ndërtimin e kësaj godine banimi dhe shërbimi në qytetin e Tiranës.
Kalojmë te leja e radhës, në datë 2 Shkurt 2021 po kompania ‘5D’ ka marrë këtë leje për një godinë tjetër banimi”, tha Këlliçi.
“Kalojmë te leja tjetër e radhës, në datë 8 Nëntor 2022 ka marrë lejen e ndërtimit për këtë godinë banimi. Ndërkohë dua të ndalem te ‘qershia mbi tortë’ është ky hotel me vlerën 15 milionë euro, vetëm një sekondë me vëmendje ju lutem, 15 milionë euro me sipërmarrës ‘Mediterrinan Investment Group’ dhe subjekt ndërtues 5 drejtorët e Bashkisë, ‘5D’ të cilat ky individ së bashku me Redi Mollën dhe Elvin Tivarin, dy bashkëpunëtorët e tij të ngushtë dikur në UKT dhe tashmë ata janë punonjës të ‘Tirana DC’ dhe të lidhur me Bashkinë e Tiranës këta zotërinjtë sot ndërtojnë hotele në vlerën 15 milionë euro”, shtoi.
“Kjo është arsyeja se përse me 14 Maj ky model do të marrë fund dhe Belind Këlliçi do të fillojë luftën pa as edhe një tolerancë dhe pa asnjë kod etike ndaj korrupsionit në Bashkinë e Tiranës. Ndaj të dashur qytetarë ndryshimi është në duart tuaja”, përfundoi ai.
