Ramazan Rraja, i shpallur në kërkim për atentatin ndaj ish-prokurorit Arjan Ndoja dhe Rrumit të Shijakut, është arrestuar nga policia.
Sipas policisë, nipi i deputetit socialist Rrahman Rraja u vu në pranga në një lokal në Fushë-Krujë. Me vete iu gjet një pistoletë me fishek në fole. Sipas bluve, 30-vjeçari, që nga momenti i shpalljes në kërkim, nuk është larguar në asnjë moment jashtë shtetit, por fshihej në trekëndëshin “Durrës – Lezhë – Tiranë”.
Gjatë aksionit u arrestua edhe Luis Konomi, njëri nga dy personat e akuzuar se kërcënoi me jetë biznesmenin e Cërrikut Eral Myftaraj për t’u tërhequr një tender i Bashkisë Tiranë.
“Në vijim të operacionit policor të koduar ‘Komploti’, të zhvilluar në janar të vitit 2023, nga Policia e Shtetit, për kapjen e 30-vjeçarit, strukturat operacionale dhe ato hetimore të Policisë së Shtetit dispononin informacion se shtetasi R.Rr. aktualisht fshihej në zonën e Krujës. Bazuar në këto informacione, mbrëmjen e sotme, në vijim të operacionit policor të koduar ‘Komploti’, u kap në një lokal në zonën e Fushë Krujës dhe u vu në pranga shtetasi i shumëkërkuar R. Rr., 30 vjeç.
Në vijim të këtij operacioni është kapur dhe vënë në pranga edhe shtetasi L. K. alias E. Ll., 39 vjeç, i cili shoqërohej me shtetasin R. Rr. dhe që ishte shpallur në kërkim në kuadër të një procedimi penal të vitit 2023, nga Policia e Elbasanit, për veprën penale “Shtrëngimi me anë të kanosjes ose dhunës për dhënie pasurie”, të kryer në bashkëpunim. 39-vjeçari do t’i dorëzohet Drejtorisë Vendore të Policisë Elbasan, për kryerjen e veprimeve të mëtejshme procedurale”, njofton policia.
Pamje nga arrestimi, publikuar nga policia
Në 1 Nëtor 2019, në autostradën Durrës-Tiranë, pranë mbikalimit të Shkozetit, është qëlluar me armë ndaj makinës në lëvizje ku ndodheshin prokurori i Durrësit Arjan Ndoja, Aleksandër Laho i njohur si Rumi dhe Andi Maloku, shoferi i magjistratit. Nga të shtënat, Maloku humbi jetën, ndërsa Ndoja dhe Laho u plagosën.
Fillimisht për ngjarjen u arrestuan dhe u lanë nën arrest me burg Redjan Rraja dhe Artiol Halilaj. Ndërsa në Janar erdhi vala e dytë e arrestimeve. Në pranga u vunë Bashkim Haxhiaj; 54 vjeç; Marsel Deçka; 38 vjeç; Kili Nerjaku alias Genti Ndërjaku, 40 vjeç; të tre banues në Durrës; si dhe Endrit Sinani, 29 vjeç dhe Juljan Pjetri, 45 vjeç, të dy banues në Tiranë.
Ndërsa në kërkim, u shpallën Amar Shkëmbi, Plarent Dervishaj, Julian Meçaj dhe Ramazan Rraja. Ky i fundit u ndalua këtë të Mërkurë, ndërsa Shkëmbi në muajin Shkurt. Nga ana tjetër, Plarent Dervishaj është raportuar se u ndalua në Dubai për llogari të autoriteteve shqiptare në Dhjetor 2020 lidhur me disa vepra të tjera penale për të cilat akuzohej, por më pas është liruar nga autoritetet atje pas mbërritjes me vonesë të letërporosisë nga Shqipëria në drejtim të Ministrisë së Drejtësisë në Dubai.
Ndaj të gjithë këtyre personave, GJKKO ka caktuar masën e arrestit me burg.
Sipas akuzës, ishte pikërisht Plarent Dervishaj urdhërues i atentatit te mbikalimi i Shkozetit. Dyshohet se mes tij dhe Aleksandër Llahos, kishte përplasje. Konflikti mes palëve dyshohet se u agravua pas atentatit që iu bë Dervishajt në Durrës në Qershor 2019, kur makina me të cilën lëvizte u qëllua me armë zjarri.
I arrestuari i kësaj të Mërkure Ramazan Rraja njihet si person me precedentë. Ndërkohë, një gjykatë në Belgjikë e dënoi atë në shkurt të këtij viti me 12 vjet burg si një prej krerëve të një organizate shqiptaro-letoneze të trafikut të drogës që tregtonte miliona kokainë, duke përfshirë portet e Antwerpen dhe Vlissingen.
Lexo edhe:
Rraja ekzekutori, si u ndoq Ndoji/ Përgjimet: ‘Fshatari’ tha s’i shkojmë dot mbrapa
“Po nuk vjen ‘Ramazani’, ti në timon, unë i gjuaj”/ Përgjimet e grupit të atentatit
