Këtë të hënë policia njoftoi arrestimin e tre persona dhe shpalljen në kërkim të bashkëpunëtorit të tyre, pas finalizimit të hetimeve një mujore që lidhen me kërcënimin e një biznesmeni në Cërrik, i cili është kërcënuar familjarisht për t’u tërhequr nga gara për një tender të Bashkisë së Tiranës.
Personat që përfunduan pas hekurave në kuadër të operacionit policor të koduar “Tenderi”, janë Algert Alcani (27 vjeç), Edmir Boci (37 vjeç) dhe Shaqir Alcani (62 vjeç).
“Në kuadër të këtij operacioni u kapën dhe u ndaluan shtetasit: E. B., 37 vjeç, A. A. 27 vjeç dhe Sh. A., 62 vjeç, tre banues në Tiranë, si dhe u shpall në kërkim shtetasi L. K., 38 vjeç. Këta shtetas, në bashkëpunim me njëri-tjetrin, kanë shtrënguar me anë të kanosjes, shtetasin E. M., administrator i një biznesi me qendër në Cerrik, Elbasan, duke i kërkuar që të tërhiqej nga një procedurë konkurrimi (tender publik), e fituar në bashkinë e Tiranës, nga firma e që ai adminsitronte. Shtetasi E. M. nuk ka pranuar të tërhiqet dhe këta shtetas e kanë kërcënuar se do të vrisnin atë dhe familjarët e tij”, njofton policia.
Treshja në fjalë akuzohen për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.
Sipas kallëzimit në polici të Eral Myftaraj, zotëruesi i kompanisë AL-MEXWOOD SH.P.K, ata e kanë kanosur dhe e shtrëngonin që të tërhiqej nga një procedurë tenderimi që kishte fituar në bashkinë e Tiranës.
Procedura e prokurimit në fjalë është hapur nga Drejtoria e Përgjithshme e Objekteve Publike në Bashkinë e Tiranës dhe fondi limit i akorduar kap vlerën e mbi 830 mijë eurove (96 427 482 (nëntëdhjetë e gjashtë milion e katërqind e njëzet e shtatë mijë e katërqind e tetëdhjetë e dy Lekë pa Tvsh).
Në garë për tenderin me objekt “blerjen e lëndëve djegëse pellet për ngrohje dhe shpërndajen në objektet arsimore”, përveç kompanisë së Myftaraj që është shpallur fituese, kanë qenë edhe dy konkurrentë të tjerë.
Njëra prej dy kompanive rivale është ‘Alcani sh.p.k.’, me 100% të aksioneve të zotëruara prej 62-vjeçarit të arrestuar, Shaqir Alcani.
Data e mbajtjes së tenderit në fjalë është 10 marsi i këtij viti, ndërsa fituesi është shpallur vetëm 7 ditë më parë, më 3 prill.
Mësohet se Shaqir Alcani së bashku me të birin Algert Alcani kanë paguar persona me rekorde kriminale dhe me origjinë nga Lezha dhe Burreli për të kërcënuar biznesmenin nga Cërriku.
Sipas hetimeve të akuzuarit i kanë vendosur pistoletën në kokë Eral Myftarajt për t’u tërhequr nga tenderi dhe e kanë kërcënuar edhe me jetën e djalit, Mateo Myftaraj.
Ndërkohë rezulton se kompania e Alcanit është përfituese e 28 tenderave, 13 prej tyre kontrata publike të lidhura vetëm me Bashkinë e Tiranës, që drejtohet nga Erion Veliaj.
LEXO EDHE:
“Tërhiqu nga tenderi”/ Kërcënuan biznesmenin se do t’i vrisnin familjen, 3 në pranga (Emrat)
