Kreu i Partisë Demokratike, Sali Berisha ka premtuar se në programin e tij elektoral do të shtohet një tjetër pikë, pikërisht për ekstradimin e Edi Ramës drejt SHBA.
Gjatë fjalës së tij jashtë Kuvendit, Berisha premtoi se do ta çojë kryeministrin Edi Rama së bashku me ambasadoren Yuri Kimi përpara drejtësisë amerikane për shkak të përfshirjes në aferën “Mc Gonigal”.
Gjithashtu Berisha tha se “i pëlqeu” vizita e Gabriel Escobar në Tiranë por pa zbuluar arsyen e vërtetë të optimizmit.
“Unë e ndoqa vizitën e ndihmës Sekretarit të Shtetit, Gabriel Escobar në Tiranë. Mua, ajo vizitë më pëlqeu. Unë kam një eksperiencë të gjatë politike. Ajo çka mund ta garantoj zotin Escobar, dhe jo vetëm atë, se në programin elektoral të Sali Berishës do shtohet një pikë: ekstradimi i Ramës në SHBA sapo drejtësia amerikane ta kërkojë për ta çiftuar me McGonigalin.
Ambasadorja Yuri Kim është një McGonigal me fustan. Me 100 për qind ajo (Yuri Kim) do jetë në hetim. Dhe unë i kam bërë thirrje inspektorit të përgjithshëm të FBI, të hetojë afera korruptive të McGonigal me fustan, përfshi pronat e saj në Shqipëri, duke garantuar se PD do ndihmojë në këtë hetim. E ftoj inspektorin e përgjithshëm për t’u njohur me fakte të pakundërshtueshme si kjo dritë dielli. Nuk mund t’i lejoj vetes të akuzoj një njeri, shqiptar apo të huaj” tha Berisha.
