Ditën e djeshme Komisioni Qendror i Zgjedhjeve miratoi shpërndarjen e fondit vjetor prej 345 milion lekë dhënë nga buxheti shtetit për 11 parti politike, me pjesën më të madhe të “tortës” që shkoi për Partinë Socialiste, pasi 74 mandatet u përkthyen në 150 milion lekë.
Ndërkohë sa i përket selisë blu, nga fondi i KQZ do të përfitojë PD e vulës, e drejtuar nga kryetari i komanduar Enkelejd Alibeaj.
Në arkat e PD-së do të derdhen 106 milion lekë, që do të menaxhohen nga Sekretari i Përgjithshëm, Gazment Bardhi, i cili administron edhe arkën e grupimit që ka në dorë vulën.
Lidhur me shpërndarjen e fondeve dhe faktin që paratë do të kalojnë për llogari të grupit Alibeaj, foli për mediat jashtë Kuvendit kryedemokrati Sali Berisha, i cili thekoi se kjo është fytyra e vërtetë e këtij regjimi.
“Një nga aktet më të turpshme, më të shëmtuara është se mundi, djersi dhe taksat e 620 mijë qytetarëve që votuan PD-në, grabiten nga një grup, pengje të Edi Ramës”, u shpreh Berisha.
Sipas liderit të koalicionit opozitar “Bashkë Fitojmë” dyshja Alibeaj dhe Basha po përfitojnë fondet e votuesve demokratë edhe pse nuk gëzojnë besimin e tyre për të drejtuar PD.
“Jo pak, por janë 2 milionë dollarë, 1 milionë dollarë është vetëm fushata. Përfaqësuesit e 620 mijë votuesve nuk marrin asnjë qindarkë. Kjo tregon fytyrën e shëmtuar të këtij regjimi. Ky tregon keqpërdorimin e dyshes famëkeqe Alibasha-Brava”, theksoi ai.
Më tej, Berisha nënvizoi se do të njoftojnë për krijimin e një rregulloreje për përballimin e shpenzimeve të fushatës me kontribute vullnetare.
“Por asgjë nuk e pengon PD-në. Ajo do financohet nga kontributet vullnetare të anëtarëve të saj. Së shpejti do njoftojmë një rregullore për përballimin e fushatës. PD-në po e financon fryma e fitores. Ka një frymë fitoreje kudo që shkon. Ju e shihni se Erion Veliaj ngarkon në furgona punonjës të policisë dhe përgatit takimet vetëm me punonjës të bashkisë. Edi Rama e hapi fushatën vetëm me nomenklaturën e tij të korruptuar, se edhe ai ka frikë nga qytetarët. Pra, janë në një dëshpërim të thellë. Forca politike e idealeve të lirisë, e transformimeve epokale të Shqipërisë është në një ngjitje vertikale. Janë të pashpresë”, deklaroi lideri i opozitës.
