Nga Boldnews.al
Gjatë pranverës së këtij viti, për rreth dy muaj rresh, Erion Veliaj shkruante “ditarin” e tij të burgut, me objektiv sulmesh prokurorin e SPAK-ut, Ols Dado. Në një prej teksteve të çartura, kryebashkiaku i Tiranës pretendonte se ai po qëndronte në paraburgim, pasi akuzohej, ndër të tjera, se i kishte dhënë me korrupsion leje ndërtimi për godinë dy-katëshe në Yrshek “katundarit” Meriman Palushi.
“Meriman Palushi paska marrë leje për shtëpi dykatëshe në katund. Online. Dhe qenka nën akuzë! “Ka ndihmuar aktivitete në Tiranë!”. Unë s’e njoh, ndërsa ai në më njeh, më njeh vetëm nga televizori”, shkruan Veliaj.
Ai, në funksion të sulmit të tij publik, sajoi një lloj dialogu imagjinar me prokurorin e çështjes, Dado: “…E po rri brenda ndyrësirë, se kështu është kur një katundari si Merimani i jep leje për shtëpi me bahçe në Yrshek, kurse një prokurori ndërtues i bën naze për lejen e një cope pallati në mes të Tiranës”.
Deklarimet për Palushin janë pjesë e morisë së të pavërtetave ose gjysmë-të vërtetave që përcjell Veliaj në “ditarin e burgut”, të cilin e nisi që prej ditës kur është arrestuar për “korrupsion pasiv” dhe “pastrim parash”, në 10 Shkurt 2025.
Në postimin e tij, kryebashkiaku i arrestuar “harroi” të tregojnë se Meriman Palushi dhe kompania e tij, “Palushi” shpk kanë marrë prej tij leje, jo vetëm për “dy-katëshin në katund”, por edhe leje për shumëkatëshe, në zona elitare të Tiranës.
Në dosjen e Prokurorisë së Posaçme përmenden edhe të paktën dy leje ndërtimi të tjera të firmosura nga Veliaj në favor të “Palushi” shpk; njëra për një 8-katësh në zonën e Pazarit të Ri, shumë pranë qendrës së Tiranës; dhe tjetra, për një godinë 10-katëshe në bulevardin “Bajram Curri”, një prej akseve kryesore të qytetit.
“Boldnews.al” kreu një vëzhgim në terren për këto dy objekte. I pari, ai pranë qendrës së Tiranës, ishte përfunduar dhe kishte nisur banimi. Tjetri, ishte në fazën e ndërtimit.
8-katëshi tek Pazari i Ri
Në 10 Shkurt 2019, kryetari i Bashkisë së Tiranës, Erion Veliaj, miraton lejen e ndërtimit për “godinë banimi dhe shërbimi 8 kate + 2 kate nëntokë”, në favor të shoqërisë “Palushi” shpk., në rrugën “Tefta Tashko Koço”.
Godina është pak metra larg rreth-rrotullimit të Pazarit të Ri dhe rreth 200 metra nga qendra e Tiranës.
Leja kishte afat maksimal 48-mujor. Tashmë, siç konstatoi “Boldnews.al”, pallati 8-katësh është ndërtuar dhe ka nisur të jetë funksional pjesërisht. Në një pamje me sy të lirë, thuajse të gjithë apartamentet ishin të banuar, ndërkohë që njësitë tregtare ende nuk ishin vënë në funksion plotësisht.
Megjithatë, falë vendit shumë të favorshëm, shumë pranë zemrës së Tiranës, duket se “Palushi” shpk nuk do të ketë pasur asnjë vështirësi në shitjen apartamenteve dhe dyqaneve.
10-katëshi tek “Materniteti i Ri”
Disa qindra metra më larg, pranë Maternitetit të Ri, në buzë të Bulevardit “Bajram Curri”, kompania e Meriman Palushit është duke ndërtuar një godinë 10-katëshe.
Në 29 Prill 2024, kryetari i Bashkisë së Tiranës, Erion Veliaj, miratoi lejen për “godinë banimi 4, 5, 6, 7, 8, 9 dhe 10 kate, me 2 kate nëntokë”, në favor të “Palushi” shpk.
Afati i lejes është 60 muaj. Megjithatë, sipas konstatimit të “Boldnews.al”, ndërtimi i godinës duket se ka ecur me ritme të shpejta.
Ndërtesa masive, e cila nis në anë të bulevardit dhe shtrihet më në thellësi të zonës, aktualisht thuajse është mbyllur si karabina.
Kompania “Palushi” shpk është krijuar në vitin 2001 dhe administrohet nga 60-vjeçari Meriman Palushi. Në kohë të ndryshme, subjekti ka realizuar ndërtime godinash në zona të ndryshme të kryeqytetit.
Edhe në rastin e dy godinave shumë-katëshe në zonat elitare të Tiranës, të miratuara nga Erion Veliaj, subjekti ka rënë dakord me pronarët e truallit dhe ka realizuar ndërtimet.
Por, ajo që e ka shndërruar Palushin në subjekt të hetimit penal, me aktor kryesor Veliajn, janë raportet e subjektit ndërtues me grupin e kompanive të menaxhuara drejtëpërdrejtë ose në hije nga Ajola Xoxa, bashkëshortja e kryetarit të Bashkisë së Tiranës.
Dhe, duket qartë, se “Palushi” shpk nuk është ajo kompania e “katundarit të shkretë që ka marrë leje për një dy-katëshe në Yrshek”, siç e prezanton Erion Veliaj në statuset e tij në rrjete sociale.
Struktura e Posaçme Kundër Korrupsionit (SPAK) dyshon se Meriman Palushi ka kryer “korrupsion aktiv”, duke kryer pagesa për Ajola Xoxan, në këmbim të favoreve nga Bashkia e Tiranës.
Palushi në dosjen e SPAK
Gjatë periudhës që “Palushi” shpk kishte raporte me Bashkinë e Tiranës për lejet e ndërtimit, subjekti privat ka financuar me 50 mijë euro dy organizata joqeveritare, “BYL-A” dhe “Eventus”.
Sipas SPAK-ut, të dyja këto qendra, si edhe disa të tjera, menaxhohen në hije nga Ajola Xoxa, bashkëshortja e Erion Veliaj.
Në dosjen hetimore thuhet se, më 6 shtator 2023, qendra “Eventus” i ka faturuar subjektit “Palushi” shpk shumën 30 mijë euro, me përshkrimin “Financim aktiviteti artistik”. Po në të njëjtën datë, organizata “BYL-A” i ka faturuar shoqërinë “Palushi” shpk shumën 20 mijë euro, me përshkrimin “Financim aktiviteti artistik”.
Në lidhje me aktivitetin e këtyre dy faturave ka rezultuar se nga komunikimet mes Adela Kondakçiut dhe Albana Koçollarit.
Kondakçiu është financierja që mbante bilancet e qendrave të dyshuara si të lidhura me Ajola Xoxan. Ndërsa Koçollari është drejtuese e zyrës ‘ANK Architecture”, e cila ka projektuar 10-katëshin e “Palushi” shpk në zonën e Maternitetit të ri, njëkohësisht është edhe motra e Albana Koçollari, një bashkëpunëtore e ngushtë e Erion Veliajt në Bashkinë e Tiranës.
Në bisedën mes zonjave Kondakçiu-Koçollari, të zhvilluar më datën 5 shtator 2023, konstatohet se kjo e fundit i kërkon Adela Kondakçiut t’i niste faturat që në total bëjnë 50 mijë euro.
Paraprakisht kësaj kërkese, Albana Koçollari, i kërkon Adela Kondakçiut që faturat të lëshohen pa TVSH nga persona fizikë, pa përcaktuar se cilët duhet të ishin këta persona.
Kjo, -thotë SPAK- në mënyrë që “Palushi” mos paguante më tepër sesa kishin rënë dakord. Prokuroria e Posaçme vlerëson me interes faktin se për faturat flitet mes Adela Kondakçiut dhe Albana Koçollarit dhe jo me përfaqësuesit e “Palushit”, si dhe të dyja faturat me këtë përshkrim lëshohen në të njëjtën datë dhe me të njëjtin përshkrim, pa TVSH, sipas kërkesës së bërë më parë nga Albana Koçollari.
