Policia e Gjirokastrës ka arrestuar dy të rinj nga Tirana, të cilët ndihmonin emigrantë nga Vendet e Treta, që të kalonin ilegalisht kufijtë, duke i transportuar me automjet, kundrejt pagesës.
Në kuadër të operacionit të koduar “Attempt 5” janë vënë në pranga shtetasit Dori Kraja, 23 vjeç dhe Indrit Gjoni, 22 vjeç, të dy banues në Tiranë.
“Shtetasi Dori Kraja, u kap në flagrancë nga shërbimet e Policisë Rrugore, në aksin rrugor “Levan-Tepelenë”, duke drejtuar automjetin tip “Audi”, pa leje drejtimi, po transportonte kundrejt pagesës, në drejtim të Sarandës, disa emigrantë nga Nepali që synonin të kalonin ilegalisht kufirin me Greqinë. Nga hetimet dyshohet se shtetasi Indrit Gjoni ishte organizatori i kësaj veprimtarie kriminale.” – thuhet në njoftimin e Policisë.
Materialet procedurale i kanë kaluar Prokurorisë së Gjirokastrës për veprime të mëtejshme.
