Kryetari demokrat, Sali Berisha, në një bashkëbisedimin me qytetarët në Facebook, deklaroi se Rama ka shkelur Kodin Zgjedhor me premtimet elektorale, dhe shpërndarjen e bonuseve apo ndërhyrjet te pagat
Berisha tha se Rama me këto veprime ka zgjuar revoltën popullore.
“Kodi elektoral po shkelet në këtë fushatë më shumë se kurrë dhe më haptazi se kurrë. Edi Rama armik i votës së lirë të shqiptarëve po përdor në këtë fushatë si kurrë në 32 vite në memorien time, qindra e qindra miliona euro për të blerë vota me to, haptas, publikisht. Shpërndan bonuse, ndërhyn në rroga, kjo s’ka ndodhur kurrë. Merr certifikatë nga KQZ-ja e tij që sipas të cilës vota në zgjedhjet lokale s’qenka votë.
Ndaj s’ka rëndësi se si veprohet. Asfalti elektoral ka plasur në të gjitha anët. Shet mafioz, ky narkoshtet po shkelmon nen për nen kartën e Kopenhagen, Kodin e Venecias apo dhe të Shqipërisë. Ajo që konstatoj unë, i them Edi Ramës; po kryen krime monstruoze elektoral, për të cilat do ndëshkohesh. Këto veprime kanë zgjuar një revoltë, këto akte të padrejta, dëshmi të verbra për të grabitur votën, kanë zgjuar një neveri, urrejtje të papërmbajtshme te qytetarët. E them me bindje të plotë se këto përpjekje do të dështojnë. Megakrim elektoral po kryen.”, tha Berisha.
Berisha tha më tej se qëllimi numër një i PD është rikthimi i të drejtës së shqiptarëve për të votuar si qytetarë të lirë.
Ai deklaroi se Rama po shkel sërish çdo rregull dhe parim të zgjedhjeve të lira dhe të barabarta.
“Qeveria e Edi Ramës nuk ka legjitimitet. Ai ka humbur që në krijimin e saj. Kjo qeveri u votua mbi sistemin e patronazhistëve dhe makinerinë e grabitjes së votës.
Qëllimi numër një është rikthimi i të drejtës së shqiptarëve për të votuar si qytetarë të lirë. Unë ju garantoj se do bëhet gjithçka për t’i shkurtuar jetën qeverisë së Edi Ramës dhe që qytetarët të votojnë të lirë.
Edhe në këtë fushatë, Rama po shkel çdo rregull dhe parim të zgjedhjeve të lira dhe të barabarta. Në fund, fatura do i shkojë vetëm atij. Ne do fitojmë!” theksoi kreu demokrat.
Berisha rezervoi një mesazh edhe për emigrantët shqiptarë kudo ku ndodhen të cilët nuk mund të votojnë pasi Rama bëhet pengesë për këtë.
Ai ftoi të gjithë emigrantët për të qenë më 14 maj në Shqipëri dhe për të votuar për pluralizmin, ndërsa për ata që nuk kanë mundësi, të bëjnë gjithçka me telefonata me të afërmit e tyre dhe t’u kujtojnë se pse nuk ndodhen në Shqipëri.
“Normalisht çdo emigrant kudo që ndodhet, më 14 maj duhet të votonte aty ku gjendet. Sot teknologjia e bën të mundur votimin në kohë reale kudo që ndodhet shqiptari. Por pengesa e vetme për këtë është Edi Rama, i cili nuk pranon dhe nuk do të pranojë që në këto zgjedhje të votojë emigracioni.
Por, këto janë zgjedhjet e jetës sonë, në kuptimin e asaj që ne ftohemi pas 32 vitesh te kutitë e votimit për të rivendosur pluralizmin dhe përmbysur monizmin.
Në këtë kontekst, në këtë betejë, angazhimi i emigracionit, qoftë duke qartësuar rolin jetik që ka pluralizmi për shoqërinë shqiptare, qoftë duke marrë ato kursime që kanë për të ardhur për ët votuar, është i një rëndësie shumë të madhe.
Me këtë rast i ftoj të gjithë emigrantët për të qenë më 14 maj në Shqipëri dhe për të votuar për pluralizmin.
Sikundër i ftoj ata që nuk kanë mundësi, të bëjnë gjithçka me telefonata, jo vetëm me familjarët, por edhe më të afërmit e tyre, t’u kujtojnë se pse nuk ndodhen në Shqipëri. T’i ftojnë të votojnë kandidatët e primareve, të votojnë ndryshimin,” tha Berisha.
