Kryetari demokrat Sali Berisha ka komentuar zgjedhjet e 14 majit, ku gjatë një bashkëbisedimi me qytetarët live në Facebook, tha se çdo votë e siglës së PD e konfiskuar shkon për kryeministrin Rama.
Berisha tha se Rama arriti të konfiskojë siglën e PD-së me gjykatës të inkriminuar që vranë ligjin në sallën e gjyqit dhe tentuan të godisnin pluralizmin në vend, por u zhgënjyen nga demokratët pasi ata me entuziazmin e tyre do të votojnë me ideale në 14 maj.
“Çdo votë për siglën e konfiskuar është votë për Edi Ramën, unë kam besim të madh tek mençuria e demokratëve, kjo betejë i ka energjizuar më shumë demokratët. Nëse shihni një entuziazëm të paparë, garantoj se një nga shkaqet është dhe konfiskimi që Rama me gjykatës të inkriminuar, me gjykatës që vrasin ligjin në sallën e gjyqit me ndërhyrjen e turpshme dhe të dënueshme arriti që me qëllimin më makabër goditjen përfundimtare të pluralizmit në vend. Rama mendoi se PD nuk do hynte në zgjedhje dhe do asgjësohej por demokratët i zhgënjyen. Pluralizmi nuk vdes kurrë në këtë vend, idealet do jenë më të forta në 14 maj.”– tha Berisha.
Më tej Berisha shprehet se krimi është i lidhur me qeverinë dhe po e kontrollon plotësisht rendin.
Berisha thotë se Çuçi nuk është ministri i rendit dhe sigurisë, por i familjes Rama dhe është ai që garanton flukset e drogës në Shqipëri.
“Krimi sot e kontrollon plotësisht rendin. Rendi dhe siguria sot janë në duart të krimit, të lidhur me qeverinë. Qeveria ka bërë të gjitha favore në nder të bandave të saj, ka shpërndarë para ka dërguar çanta e valixhe te bandat për t’i shpërndarë, ka lejuar të vrasin dhe të ekzekutojnë. Çuçi nuk është ministri i rendit dhe sigurisë por i familjes, të garantojë flukset e drogës në Shqipëri. Sera në Berat ku punonin 100 gra, të çonin te ministri. Ministri Çuçi është thjesht ministër i familjes Rama.“- thotë Berisha.
