Ditën e sotme në orën 15:00 ishte parashikuar të zhvillohej takimi mes Kastriotit dhe Bylis, por FSHF-ja ka vendosur shtyrjen e saj, ku theksohet se arbitrat janë kërcënuar me jetë. Në të tilla kushte nuk kanë marrë dot përsipër arbitrinin në këtë përballje.
Kastrioti-Bylis ishte e vlefshme për javën e 28-të të Abissnet Superiore. Pikërisht sot “çelet” edhe sipari i fazës së katërt të kampionatit, teksa skuadrat tashmë do të luftojnë “dhëmb për dhëmb” për të siguruar pikët që iu duhen për të arritur te objetivat e tyre.
Por kur janë zhvilluar 3 faza, shumë trajnerë janë larguar nga ekipet që drejtonin. Dy skuadra këtë fazë do ta nisin me timonier të ri.
Te Laçi do të debutojë Stavri Nica, ndërsa te Vllaznia Goce Sedloski. Jetëgjatësia e trajerëve në stolin e skuadrave nuk është e lartë, pasi vetëm Shehi, Colella dhe Kapllani kanë mundur t’u shpëtojnë “stuhive” të këtij sezoni.
Plot 6 skuadra janë drejtuar nga 3 trajnerë të ndryshëm brenda këtij sezonit. Teuta, Kukësi, Vllaznia, Egnatia, Kastrioti dhe Laçi kanë bërë ndryshime të vazhdueshme, pasi rezultatet e grumbulluara kanë qenë zhgënjyese. Bylisi nga ana tjetër vetëm dy trajnerë.
Renato Arapi dhe Bledi Shëkmbi u larguan nga Teuta për t’i lënë vendin Edi Martinit, ndërsa te Kukësi fillimisht Skënder Gega e më pas Enkeleid Dobi, për t’i lënë stafetën Rraman Hallaçit.
Mirel Josa u largua nga Vllaznia, ndërsa Auron Miloti qëndroi vetëm 1 ndeshje te kuqeblutë, ku tashmë Sedloski do të debutojë në Shkodër. Emiliano Çela e nisi fillimisht sezonin te krutanët, më pas u largua dhe vendin e tij e mori Ardian Mema. Edhe ky i fundit u largua dhe Çela u rikthyer sërish për të shpëtuar anijën nga “mbytja”, pasi luftojnë për mbijetesën.
E njëjta situatë edhe te Egnatia. Tetova do të startonte në fillim ku më pas do të zëvendesohej nga Duro. Përsëri do të bëhej “rrotacion” dhe Tetova do të merrte “frenat” e rrogozhinasve pas largimit të Duros. Vukicevic-Mezani dhe tashmë Nica te Laçi, kurse te Bylisi Bellai dhe Shensoi.
Plot 20 trajnerë janë ndërruar gjatë 27 javëve kampionat në këtë sezon, një numër in lartë që tregon edhe situatën e tensionuar te ekipet shqiptare.
Të vetmit që kanë “mbijetuar” janë Orges Shehi i Tiranës, Giovanni Colella i Partizanit dhe Xhevahir Kapllani i Erzenit.
