Kryetari i Partisë “Lëvizja Bashkë”, Arlind Qori ka hedhur akuza të forta ndaj kryebashkiakut socialist, Erion Veliajt për të cilin thotë se nuk ka lënë asnjë metër katror hapësirë publike por të gjitha janë zëvendësuar nga betoni i kullave shumëkatëshe.
Gjatë një postimi në rrjetet sociale, Arlind Qori thekson se bashkia e Tiranës për të patur 20% më shumë të ardhura, do të duhej që çdo vit të jepen leje të shumta ndërtimi e të ngrihen pambarimisht kulla.
Qori bën me dije se “bashkia e drejtuar nga Erion Veliaj na detyron të gjithëve ne të paguajmë një taksë vjetore për banesën, ndërsa oligarkëve që kanë ngritur hotele e resorte me 4 a 5 yje, duke zaptuar hapësirën publike e shkatërruar parqet e lulishtet, nuk u merr asnjë lek taksë ndërtese”.
Reagimi i plotë nga Arlind Qori:
“Unë jam i majtë” – ka thënë Erion Veliaj. “I taksoj ndërtuesit 10-fish dhe me to mbush gjysmën e buxhetit të bashkisë”.
Dihet që Erion Veliaj është gënjeshtar. Në fakt taksa e ndikimit në infrastrukturë nga ndërtimet e reja është 8% dhe zë rreth 20% të buxhetit të Bashkisë së Tiranës. Nëse i heqim buxhetit të bashkisë burimet e tjera (transfertat nga qeveria dhe të ardhurat e mbartura), sërish taksa e mësipërme zë vetëm 33% të të ardhurave të bashkisë.
Sidoqoftë problemi më serioz i taksës së ndikimit në infrastrukturë nuk është niveli i saj (i cili mund të ishte edhe më i lartë për ndërtesat që gjenerojnë fitime të jashtëzakonshme), por fakti që vjelja e kësaj takse mbështetet mbi një model të paqëndrueshëm zhvillimi. Që bashkia të ketë 20% më shumë të ardhura, do të duhej që çdo vit të jepen leje të shumta ndërtimi e të ngrihen pambarimisht kulla. Mirëpo trualli është i fundëm, ndryshe nga grykësia për të fituar shpejt e shumë.
Pra për të pasur ca para më shumë, do të duhet të mos kishim më fare hapësirë, të zhdukej çdo shesh e lulishte, të betonizohej krejt Parku i Liqenit, të zaptohej çdo trotuar dhe të arrinim në një realitet distopik të kullave që ndërtohen ngjitur me kulla të tjera dhe ku njerëzit të ecin në rrugica të ngushta e pa diell si akrobatët në litar.
Nga ana tjetër bashkia e drejtuar nga Erion Veliaj na detyron të gjithëve ne të paguajmë një taksë vjetore për banesën, ndërsa oligarkëve që kanë ngritur hotele e resorte me 4 a 5 yje, duke zaptuar hapësirën publike e shkatërruar parqet e lulishtet, nuk u merr asnjë lek taksë ndërtese.
Lëvizja BASHKË e merr seriozisht zhvillimin e qëndrueshëm të Tiranës. Ne jemi kundër xhunglës së betonit dhe do të zbatojmë politika ekonomike të orientimit të kapitalit drejt sektorëve ku prodhimi i vlerës shoqërohet nga shtimi i radhëve të punëtorëve dhe një punë gjithnjë e më e kualifikuar.
– Imazhi shoqërues nuk është shkrepur në Ukrainë, por në zemër të Kombinatit, aty ku bashkia ka përzënë banorët e pallatit të vjetër për ta shndërruar truallin në shesh ndërtimi për oligarkët. Të cilët, dora në zemër, jo 8 po edhe 18% do të paguanin me qejf në kushte kaq të volitshme”, shkruan Qori.
