Territori i Shqipërisë është përfshirë nga temperatura të ulëta dhe mot me vranësira e reshje shiu në javën e fundit.
Në zonat malore ndërkohë janë regjistruar edhe reshje dëbore, me trashësinë që ka arritur nga 10 deri në 20 cm.
Në orët e para të mëngjesit të sotëm moti ka surprizuar teksa flokë dëbore janë parë edhe në Jug të vendit, në zonën e Llogarasë.
Sipas Autoritetit Rrugor Shqiptar gjatë orëve të para të mëngjesit ka pasur reshje dëbore me intensitet mesatar, teksa temperatura ka shënuar 1°C.
Në terren është punuar me mjete borëpastruese dhe me shpërndarjen e kripës për të evituar ngricat në rrugë dhe në çdo moment qarkullimi është kryer pa probleme.
