Deputetja e Partisë së Lirisë, Monika Kryemadhi u shpreh këtë të Martë se një skemë grabitje me taksat e qytetarëve po ndodh me inceneratorin e Tiranës, nën dirigjimin e kryebashkiakut të kryeqytetit Erion Veliaj.
Ajo llogarit se vetëm në ditë inceneratori, gllabëron 100 mijë euro nga taksat dhe xhepat e qytetarëve të Tiranës, që nëse do të administroheshin si duhet, shumë punë emergjente për qytetin do të ishin mbaruar.
“Paditë që kam bërë në SPAK kanë çmontuar skemën e vjedhje që i bëhet qytetarëve shqiptar. Vetëm bashkia e Tiranës paguan 29 euro tonin e mbetjeve, 1 mijë ton në ditë I thonë 29 mijë euro në ditë. E gjithë kjo pagesë shkon për riciklim diferencim dhe djegie. Pa llogaritur që ne kemi kompani të tjera që paguhen nga bashkia e Tiranës me qëllim transportimi, pastrimi, lyerja e koshave, ndërrojnë makinat, pastrojnë makinat të cilat paguhen nga taksat e qytetarëve.
Ne nuk po paguajmë vetëm 29 euro për ton por të gjitha shërbimet e tjera, e njëjta skemë është edhe nga bashkia e Durrësit, pastaj vazhdojmë me kompanitë private të dherave që hapin gropa të mëdha dhe çohen e groposen me para dhe trashë-trashë janë 100 mijë euro që fitohen në ditë nga inceneratori i Tiranës.
Të gjitha këto para shkojnë në kompanitë offshore dhe nuk dihet se ku përfundojnë këto para që nëse do të ishin pjesë e buxhetit të Tiranës do të bëheshin shumë punë”, tha Kryemadhi në emisionin “Task Force” në Syri Tv.
