Në një konferencë të përbashkët për mediat nga Kryeministria, Përfaqësuesi i Bankës Botërore në Shqipëri, Emanuel Salinas i ka përplasur në sy disa të vërteta Edi Ramës, duke vendosur theksin te shqetësimi që lidhet me shpopullimin e Shqipërisë.
Vala e lartë të emigrimit, kryesisht të të rinjve në dekadën e fundit kur vendi është drejtuar nga socialistët duket të jetë kështu një kambanë alarmi për Bankën Botërore, e cila sipas Salinas e shpreh problemin në një spektër më të gjerë sesa thjesht te pagat demotivuese.
Përfaqësuesi i BB ia tha në sy Ramës se largimi masiv i të rinjve drejt vendeve të BE-së është i motivuar nga mungesa e perspektivës dhe dëshira për të krijuar një të ardhme mbi baza të sigurta.
“Çështja e emigracionit është komplekse, po pagat janë një pjesë e rëndësishme. Po kështu kur flasim me njerëzit sidomos të rinjtë, nuk është vetëm çështja e pagave, por çështja për të pasur jo vetëm një punë të mirë , por edhe një punë për të krijuar perspektive. Sa për emigracionin duhet të mundësojmë sektorin privat për të qenë më aktiv në vend. Ka më shumë potencial për të sjellë në vend investime e mundësi”, u shpreh Salinas.
Rama në krahun tjetër u përpoq të zbuste forcën e “shuplakës” së Bankës Botërore mbi perceptimin për arsyet pse emigrojnë shqiptarët.
Duke marrë një shembull aspak koherent, ku vendos në baraspeshë Shqipërinë me Italinë, shefi i qeverisë u përpoq të relativizonte “hemorragjinë e trurit”, pra profesionistëve, duke thënë se ky fenomen po ndodh edhe në Verona që është rajoni më i pasur i fqinjit përtej Adriatikut, me prodhim të brendshëm bruto 5 miliard.
Në tentativën për të fshehur dështimin në qeverisje dhe mungesën e alternative apo projekteve motivuese për të stimuluar qëndrimin e të rinjve në Shqipëri, Rama zgjodhi ta adresonte problemin si të përgjithshëm, duke e cilësuar një trend ndërkombëtar.
“Tani pse ikin? Se ka korrupsion? Jo, ikin se kjo është koha ku ne jetojmë, e bën të mundur që aspiratat më të larta të ndiqen duke shkuar në vendin ku pagat janë më të larta. Nuk ka asnjë forcë që të përmbysë këtë trend, duhet që të bëjmë progresin që mund të bëjmë dhe kjo rritje pagash do ndihmojë shumë po nuk do ta frenojë këtë trend”, u shpreh kreu i qeverisë.
Por as kjo përgjigje nuk e ngrohu Salinas, i cili në gjykimin e tij paraqiti disa alternativa sesi BB synon të angazhohet për të punuar në krijimin e mundësive më të mira të punësimit për qytetarët shqiptarë, me qëllimin për të frenuar shpopullimin.
“Jemi zotuar për më shumë vende punë sidomos për rininë. Ne e vendosim theksin tek më e mira dhe kjo është sfida jonë. Gjithashtu me rëndësi është edhe kapitali njerëzor. Jemi të shqetësuar për numrin e personave që largohen nga Shqipëria, por bashkë mendojmë se mund të krijojmë përmirësime të mbrojtjes sociale, shëndetësinë apo edhe për rindërtimin e spitaleve. Shtylla e tretë e strategjisë sonë përqendrohet tek rezistenca, siç e dimë jemi përballur me shumë kriza dhe ne duan të punojmë për të rritur rezistencën për t’u përballur me krizat e ardhshme”, tha ai.
LEXO EDHE:
Shpopullimi i Shqipërisë, Rama pa “pikë turpi”: Edhe në Itali po largohen të rinjtë!
