Kryetari demokrat Sali Berisha, në një konferencë për mediat ditën e sotme, zbuloi propozimin në lidhje me rritjen e pagave.
Berisha tha se përdorimi i qindra miliona eurove nga Rama për rritje e pagave para zgjedhjeve është për qëllime elektorale dhe e konsideroi të turpshme, antiligjore e antikushtetuese. Ai shtoi se qëllimi i tij i vetëm është të ndikojë në votën e zgjedhësve.
Më tej, Berisha tha se deputetët e PD-së do të dorëzojnë në Kuvend projektligjin për dyfishimin e pagave. Ai theksoi se objektivi nëse PD do të vijë në pushtet do të jetë 3 fishimi i rrogave të qytetarëve shqiptarë.
“PD denoncon të turpshme, antiligjore, antikushtetuese përdorimin e qindra milionë eurove për qëllime elektorale nga Edi Rama.
Garantoj qytetarët se jo dyfishimi i rrogave, por trefishimi do jetë objektiv numër një i qeverisjes së PD.
Por rritjet e rrogave, në asnjë vend të lirë, nuk bëhen para zgjedhjeve, para votimit të qytetarëve.
Ai që bën një akt të turpshëm është një kriminel elektoral, një bandit i vërtetë, një mashtrues ordiner.
Pagat e ulëta duhet të dyfishohen dhe ne i garantojmë të gjithë punonjësit që pagat në të gjithë piramidën shtetërore do dyfishohen.
Por këto akte nuk merren kurrë me qëllim për të ndikuar votën e qytetarëve.
Thirrja e tij për rritjen e rrogave të ulëta është një demagogji, pasi ajo nuk bëhet me vullnet, ajo është një thirrje thjesht propagandistike.
PD do depozitojë në parlament ligjin për dyfishimin e rrogave të ulëta si akt i parë.
Ky ligj do jetë i detyrueshëm për çdo institucion të këtij vendi, për çdo sipërmarrje të këtij vendi.
Ne këto veprime nuk i bëjmë për propagandë, ne i bëjmë se kemi bindje se një ndëshkim madhor më kryesor i këtyre 9 viteve ka qenë ngrirja e rrogave dhe pensioneve, de facto ulja e frikshme e tyre për shkak të inflacionit”, tha Berisha.
