Nga Boldnews.al
I vendosur nën trysninë e opinionit publik, mbi komentet seksiste ndaj një vajze të mitur të denoncuar të zhdukur, kreu i Policisë së Shtetit Muhamet Rrumbullaku, vendosi pezullimin nga detyra 30 ditë për shefin e antikrimit në komisariatit 1, Rustem Dervishi, ndërsa fali shefin e komisariatit Petrit Halo dhe padyshim dhe “dorëputhësen” e Ramës, efektiven Ina Nuka.
Që të tre u përfshinë në një bisedë në kapërcim të kufijve të perversitetit dhe seksizmit ndaj së miturës e cila ishte shpallur e zhdukur nga familjarët e saj. Ndërsa prindërit prisnin “lajmet e mira” nga “policia që duan”, tre efektivët e nivelit të lartë bënë atë që nuk duhet, duke nisur komentet aspak etike në grupin e punës në aplikacionin Whatsapp. Burrat e frustruar edhe seksualisht që mbajnë veshur uniformën e policisë së shtetit, nuk i përmbajtën komentet e ndyra, duke përmendur “parakolpin”, (gjoksin) e së miturës, “vitprodhimin” (moshën), apo ironi të tjera që në çdo rast ishin “epshe”, të cilave iu bashkua “policja më e njohur” në vend, Ina Nuka.
E gjithë biseda është tërësisht fyese ndaj një vajze të shpallur të zhdukur dhe protagonistë janë që të tre efektivët. Mirëpo ditën e djeshme, kreu i Policisë së Shtetit mori një vendim që deri diku ishte i pritshëm, duke marrë në konsideratë mënyrën si funksionon kupola me gjoksin e graduar.
Minimalisht që të tre duhet të pezulloheshin nga detyra, por u gjet personi me më pak “miq” për tu bërë shembull, për disa arsye. Kryepolici Rrubullaku pak ditë pasi mori detyrën emëroi në Komisariatin 1, të besuarin e tij Petrit Halo. Majën e komisariatit nuk e preku, por njëkohësisht nuk shkoi më larg, pasi “largqoftë” mund të merrte ndonjë masë disiplinore për policen Ina Muka, atëherë spaletat e rënda në supet e Rrubullakut mund të “lëviznin lehtë” nga dy njerëz shumë të mëdhenj; kryeministri Edi Rama dhe kryebashkiaku i Tiranës Erion Veliaj.
Vetë Rama, i përkulur gati në gjunjëzim, u shfaq pesë vite më parë duke puthur duart e efektives së Repartit Shqiponja, Ina Nuka.
Gjithçka lidhej me një incident të rëndë të ndodhur në protestën e banorëve të Unazës së Re në nëntor të vitit 2018, të cilët u përplasën me forcat e policisë. Një kapsollë u hodh nga protestuesit në qafën e Nukës dhe në tentativë për ta larguar i shpërtheu në duar, duke humbur pjesën e sipërme të gishtit të madh.
Pikërisht ai gisht u kthye në histerizmin qeveritar. Vetë Rama u kujdes që të kryhej operacioni i specializuar për gishtin efektives dhe i shërbeu për të përdorur gishtin e tij tregues (me thonj të gjatë), ndaj opozitës dhe protestuesve. Kësaj shfaqje nuk kishte si t’i mungonte kryebashkiaku i Tiranës, Erion Veliaj, i cili si një “babaxhan” dhe personazh i “dhimbsur”, mendoi sesi një “femër pa gishta” do të gjente burrë e më pas të krijonte familje.
“Nuk është gjynah ajo vajza pa gishta? Të gjitha burra jemi këtu, i shkojnë sytë ndonjërit prej nesh këtu që të martohet me një gocë pa gishta?! I kemi shkatërruar jetën dhe dashtë Zoti daltë me sukses, ajo që u bë u bë tani”, u shpreh Veliaj, duke rrudhur buzët para kamerave që i kapnin edhe gishtin e tij të madh, në duart që kurrë si ndalojnë kur flet.
Tullumbacja e tejfryrë e një propagande qeveritare zgjat, por ka një moment që shfryhet. Ironikisht efektivja Nuka në profilin e saj mban foton ku Rama shfaqet duke i puthur duart, pasi ajo u kthye në detyrë. Padyshim që një vajzë e re në nisje të karrierës së saj ku ndodhet para bombardimit me propagandë, duke u begenisur nga kryeministri dhe kryebashkiaku, merr eufori. E falshme deri diku euforia e saj, por është e pafalshme sesi një femër komenton një femër tjetër, për tu futur në gojën e eprorëve meshkuj.
Çdo gjë po i lihet kohës që të kalojë, që një skandal të mbulojë një skandal tjetër për të bashkëjetuar me skandalet duke i konsideruar si normale. Paradosalisht hetimin e mëtejshëm të kësaj ngjarje të rëndë të gatuar në komisariatin nr 1 do e marrë në duar Ardi Veliu. Pikërisht ky personazh i cili prej shumë vitesh ka ngatërruar me dëshirë garderobën, duke hequr uniformën e policisë së shtetit dhe veshur kostumin e pushtetit. Ndërsa në hall për momentin janë edhe Rama me Veliajn që u investuan kaq shumë për duart e polices Nuka, që për fat të keq po ato duar i përdori për të komentuar në mënyrë seksiste një vajzë të zhdukur, ndoshta për të vetmen arsye që tu shkonte nga pas epshorëve shefa.
