Analisti Lorenc Vangjeli ka komentuar atentatin në lokalin e Fatjon Muratit në Don Bosko ku mbeti e vrarë banakierja 58-vjeçare, Mimoza Paja.
Sipas tij, një prej shkaqeve kryesore të ngjarjeve kriminale në vend janë pazaret e drogës, ndërsa e dyta gjakmarrja.
Vangjeli shprehet se shoqëria shqiptare ndjek modelin e të fortëve dhe të pasurve. Vangjeli tha tek “Të Paekspozuarit” se prej 30 vitesh shqiptarët jetojnë me sytë dhe shpresën nga një dorë njerëzish në politikë.
“Kjo që sapo pamë është vetëm pasoja. Një nga hallkat fundore të zinxhirit, rrethanat mund të thonë që mund të ndodhë edhe nesër, pasnesër se minat që janë mbjellë në shoqërinë tonë…do ndryshojnë rrethanat, aktorët, por jo shkaku. Rrethanat kryesore janë prishja e pazareve të drogës, e dyta është gjakmarrja. Do të shohim pasojën, por shkaku është droga. Dhe sa kohë nuk ka një luftë të mirëfilltë ndaj drogës, pasojat do t’i shohim gjithmonë.
Shoqëria shqiptare konsideron si model suksesi vetëm të pasurin, pa pyetur se si e ka bërë pasurinë. Modelin e të riut me fuoristradë. Nuk ka bandit që bëhet gjysh, nuk ka bandit që del në pension, herët a vonë përfundojnë të gjithë njësoj. Por problemi është deri sa të përfundojnë ata, sa do ikin si ajo banakierja e pafajshme.
Ne jetojmë prej 30 vjetësh me hallet e ca pak njerëzve, të cilët njëherë lart, njëherë poshtë po janë po ata, na duket se halli i tyre është halli i gjithë shqiptarëve. Shëmbur merita, shembur karriera”, tha Vangjeli.
